Búgin Nur-Sultan qalasynan kelgen reseilik dárigerlerdi Atyraý oblysynyń ákimi Mahambet Dosmuhambetov qabyldap, qalyptasqan ahýaldy túsindirip, jumysyna tabys tiledi, - dep habarlaidy óńirlik kommýnikatsiialar qyzmeti.
«Jaǵdaidy kórip otyrsyzdar. Elimizde qazir koronavirýspen birge pnevmoniia derti de ýshyǵyp tur. Osy aida oblystyq aýrýhana janynan 400 oryndyq infektsiialyq statsionar ashylady, sonymen birge Qurmanǵazy aýdanynan da qosymsha oryndar jasaqtalyp jatyr. Biz qajetti statsionarlyq orynmen, dári-dármekpen, qural-jabdyqpen tolyqtai qamtamasyz etemiz. Bastysy, sol jasaqtalyp, ashylyp jatqan oryndarda naýqastardy emdeitin dárigerler kerek. Jyldar boiy kele jatqan meditsinalyq mamandar tapshylyǵy qiyn kezde anyq baiqaldy», - dep atap ótti Atyraý oblysynyń ákimi Mahambet Dosmuhambetov.
Sondai-aq aimaq basshysy jaqyn arada Reseidiń Astrahan oblysynan taǵy bes dáriger maman keletinin de aitty.
«Pandemiiamen kúreske jumyldyrylǵan barlyq dárigerlerge jaǵdaiy jasalǵan ári jan-jaqty qoldaý jalǵasa beredi»,- dedi ol.
Ýaqytsha saparmen kelgen reseilik dárigerler Atyraýda úshinshi tamyzǵa deiin jumys isteidi.
Eske sala ketelik, buǵan deiin Atyraý oblysynda meditsina salasynda 278 maman jetispeitinin habarlaǵan bolatynbyz.
