At mingizilgen videosy áleýmettik jelige taraǵan Atyraý oblysy Politsiia departamentiniń bastyǵynyń isine qatysty qyzmettik tekserýdiń qorytyndysy belgili boldy, dep habarlaidy "Ult aqparat" QR IIM baspasóz qyzmetine silteme jasap.
«Ishki ister ministrliginiń Tártiptik keńesi tóraǵalyǵymen Atyraý oblysy Politsiia departamentiniń bastyǵy A.S. Dúisembaevqa qatysty qoǵamdyq rezonans týǵyzǵan fakti boiynsha atalǵan óńirge ministrdiń orynbasary A. Kalaichidi bastaǵan Ishki ister ministrliginiń arnaiy komissiiasy jiberildi.
Komissiia A.S. Dúisembaevtyń qyzmettik ádep tártibin buzýshylyǵyn anyqtaǵan qyzmettik tekserýdiń qorytyndysyn qarady», delingen habarlamada.
Ministrliktiń málimetinshe, qyzmettik tekserý qorytyndysy boiynsha Ishki ister ministri A.S. Dúisembaevty atqaryp otyrǵan laýazymynan bosatý týraly QR Prezidenti Ákimshiligine usynym engizý jóninde sheshim qabyldaǵan.
«Sonymen qatar, oblystyń Ózindik qaýipsizdik basqarmasynyń bastyǵy politsiia maiory S.A. Qaliev ornynan bosatyldy jáne birqatar laýazymdy tulǵalar qatań tártiptik jaýapkershilikke tartyldy. Sondai-aq, ministrdiń orynbasary jeke qurammen qyzmettik tártip pen zańdylyqty saqtaý máselesi boiynsha jedel keńes ótkizdi», delingen ministrlik taratqan habarlamada.
Eske sala ketsek, QR Ishki ister ministrligi osy oqiǵa boiynsha túsinikteme bergen edi. Al, QR Prezidenti Qasym-Jomart Toqaev Atyraý oblystyq PD bastyǵynyń áreketin tekserýdi tapsyrǵan bolatyn.
Al áleýmettik jelide Qazaqstan Prezidenti, Ishki ister ministri men Atyraý oblysy ákimine jazylǵan hat jariialandy. Politsiia departamenti bastyǵyna at mingizgen aýyl turǵyndary hat jazǵan kórinedi.
Olardyń aitýynsha, general Dúisenbaev syilyqtan bas tartyp, adamdardyń kóńilin qaldyrmaý úshin ǵana atqa minip, bir ainalyp shyqqan.
