Atyraý qalasynyń mamandandyrylǵan tergeý soty izoliatorda otyrǵan oblys ákiminiń orynbasary Baqytgúl Hamenovany úiqamaqqa jiberýge ruqsat berdi. Tergeýdiń qamaýǵa alý týraly ótinishi qanaǵattandyrylmady.
Atyraý oblysy ákiminiń orynbasaryna qatysty qylmystyq is Qazaqstan Qylmystyq kodeksiniń 366-babynyń 2-bóligi "Qomaqty kólemde para alý" boiynsha tergelip jatyr, dep jazdy Sputnik portaly "Aq Jaiyq" basylymyna silteme jasap.
Eger Hamenovanyń kinási sotta dáleldense, paranyń 60 eselengen kóleminde aiyppul tóleýi nemese 7 jylǵa deiin bas bostandyǵynan aiyrylýy múmkin.
Buǵan deiin kúdiktini Atyraýǵa Nur-Sultannan arnaiy kelgen sybailas jemqorlyqqa qarsy kúres agenttiginiń bir top qyzmetkeri ustaǵany habarlanǵan bolatyn.
Baqytgúl Hamenovanyń ómirbaiany
Atyraý qalasynda 1981 jyly týǵan. H. Dosmuhamedov atyndaǵy Atyraý memlekettik ýniversitetin bitirgen, qazaq tili jáne ádebieti pániniń muǵalimi; Ál-Farabi atyndaǵy Qazaq ulttyq ýniversiteti, aspirant; Atyraý munai jáne gaz institýty, munai jáne gaz injeneri; M. Ótemisov atyndaǵy Batys Qazaqstan memlekettik ýniversiteti, ekonomika jáne biznes bakalavry. Filologiia ǵylymdarynyń kandidaty.
1999-2001 jyldary Atyraý oblystyq teleradio-aqparattyq kompaniiasynyń diktory, redaktory.
2001-2004 jyldary Atyraý munai jáne gaz institýtynyń qazaq jáne orys tilderi kafedrasynyń oqytýshysy, H. Dosmuhamedov atyndaǵy Atyraý memlekettik ýniversitetiniń elitarlyq mektebi direktorynyń tárbie jumysy jónindegi orynbasary.
2004-2005 jyldary "Rahat TV" Atyraý teleradio habarlaryn taratý filialy qazaq redaktsiiasynyń korrespondenti.
2005-2016 jyldary Atyraý Kaspii óńiriniń qazirgi zamandaǵy kolledjiniń direktory.
2016 jylǵy 24 naýryzdan bastap 2020 jyldyń 13 naýryzna deiin – altynshy sailanǵan Qazaqstan parlamenti májilisiniń depýtaty.
2020 jyldyń 13 naýryzynan bastap – Atyraý oblysy ákiminiń orynbasary.
