Atyraý munai óńdeý zaýytynda sarqyn sýdy biologiialyq tazartý blogyndaǵy aqaýǵa jol bergender jazalanady, dep habarlaidy "Ult aqparat" «QazMunaiGaz» ulttyq kompaniiasynyń baspasóz qyzmetine silteme jasap.
5 qarashada «QazMunaiGaz» UK AQ basqarma tóraǵasynyń munai óńdeý jáne munai himiiasy jónindegi orynbasary Daniiar Tiesovtiń Atyraý munai óńdeý zaýytyna arnaiy sapary barysynda jinalys ótti.
«Jinalysta biologiialyq tazartý qurylǵysynda oryn alǵan oqiǵa qarastyryldy. Atap aitqanda, qazirgi kezde munai ónimderiniń bekitilgen normadan shekti ruqsat etilgen shyǵaryndylarynyń joǵary mólsheri anyqtalmaǵany jóninde esep berildi. Budan bólek, oqiǵa sebepteri men júrgizilgen tekserýdiń nátijeleri eskerilip, tabiǵatty qorǵaý boiynsha is-sharalar jospary qaita pysyqtaldy», delingen habarlamada.
Oqiǵany tergeý jónindegi komissiianyń tekserý nátijeleri boiynsha AMÓZ-diń jaýapty tulǵalaryn jazaǵa tartý týraly sheshim qabyldanady.
«Qala úshin kúrdeli oqiǵa oryn aldy. Oǵan zaýyt jaýapty. Qala turǵyndarynan keshirim suraimyz. QMG basshylyǵy jaǵdaidy jiti baqylaýynda ustap otyr. Biz zaýytta aýqymdy jańǵyrtý jumystaryn júrgizdik, biraq, ókinishke qarai, qyzmetkerlerimizdiń sana-sezimi, sonyń ishinde óndiristik tsiklder úshin jeke jaýapkershiligi jaǵy áli de jańǵyrý ústinde. Bul qyzmetkerler de osy qalanyń turǵyndary, olardyń jumysynyń nátijesi búkil Atyraý halqynyń aman-saýlyǵyna tikelei áser etedi. Zaýyt asa qysqa merzim ishinde jaǵdaidy túzetip, aldaǵy ýaqytta osyndai apattardy boldyrmaý boiynsha tiisti sharalar qabyldaýǵa tiis», – dep atap aitty D.Tiesov.
Eske sala keteiik, 1 qarashada saǵat 16.00-de elektr qýatyn berýdegi aqaýy saldarynan sarqyn sýdy biologiialyq tazartý blogy tundyrǵyshynyń shlamdy retsirkýliatsiialaý sorǵysy toqtap qalǵan. Soǵan bailanysty tundyrǵyshtyń qum súzgisine shyǵýy ornynda qalqyma jáne organikalyq zattar (bioshlam) shyǵaryndylary shamadan asty. Bul kezde qum súzgisi blogynda jóndeý jumystary júrip, atalǵan blok tehnologiialyq shemadan ýaqytsha ajyratylǵan edi. Sonyń saldarynan biologiialyq tazartý qurylystarynan quramynda qalqyma jáne organikalyq zattary bar sarqyndy sý normativti tazartylǵan sarqyndy sý arnasyna aǵyp ketti. 1 qarashada saǵat 23:00-de biologiialyq tazartý qurylystarynyń jumysy qalpyna keltirildi. Sonymen qatar, normativti-tazartylǵan sarqyndy sý arnasynda bioshlamnyń býlaný óristerine odan ári ótýine jol bermeitin bógetter ornatyldy. Qazirgi ýaqytta arnadaǵy bioshlam vakýýmdyq mashinalarmen sorylyp, zaýytqa qaita ákelinip jatyr.
