Atyraý munai óńdeý zaýytynda jóndeý jumystary aiaqtaldy, dep habarlaidy "Ult aqparat" Energetika ministrliginiń baspasóz qyzmetine silteme jasap.
«28 sáýirde «Atyraý MÓZ» JShS-da jóndeý jumystary júrgizilip bolǵannan keiin barlyq qondyrǵylar tehnologiialyq rejimge shyǵaryldy.
Joǵaryda atalǵan jumystardyń nátijesinde joǵary oktandy benzin óndirisiniń kólemi táýligine 4 myń tonnaǵa deiin, iaǵni 2 esege artty», delingen habarlamada.
Vedomstvonyń málimetinshe, mamyr aiynda Shymkenttegi munai óńdeý zaýyty ««PetroKazahstan Oil Prodakts» JShS-nda kúrdeli jóndeý jumysyn júrgizý josparlanyp otyr.
«29 sáýirdegi jaǵdai boiynsha munai ónimderiniń jiyntyq qory qolaily deńgeide, iaǵni benzin 267,0 myń tonna, al dizel otyny 335,3 myń tonna, atalǵan jaǵdai tapshylyqtyń joqtyǵyn jáne ishki naryqtyń qajettilikterine arnalǵan JJM kólemi «PKOP» JShS jóndeý jumystary júrgiziletin kezde de jetkilikti mólsherde bolatyndyǵyn kórsetedi», - dedi ministrlikten.
Budan buryn habarlanǵandai, 12 sáýirde Úkimet otyrysynda QR Energetika ministri Nurlan Noǵaev Atyraý munai óńdeý zaýytyn sáýir aiynyń sońyna qara iske qosý josparlanyp otyrǵanyn aitty.
«Atalǵan kórsetkishterdiń tómendeý sebepteri aǵymdaǵy jyldyń qańtar aiynda Atyraý munai óńdeý zaýytynda elektr energiiasyn jetkizýde paida bolǵan irkiliske bailanysty. Bul tehnologiialyq qondyrǵylardyń (katalitikalyq kreking jáne onymen bailanysty qondyrǵylar, katalitikalyq riforming, benzin men dizeldi gidrotazalaý, kúkirt óndirý qondyrǵylarynyń) avariialyq toqtaýyna ákeldi, sonyń saldarynan jóndeý jáne qalpyna keltirý jumystaryn júrgizý qajettiligi týyndady», - dedi Noǵaev.
