Atyraý qalasynyń shetinde ornalasqan munai óńdeý zaýyty basqa jerge kóshirilmeidi. Bul týraly búgin Atyraý oblysynyń ákimi Mahambet Dosmuhambetov aitty, dep habarlaidy QazAqparat.
«Zaýyt qalanyń shetinde ornalasqan. Úsh kezeńmen jańǵyrtýdan ótti. 40-shy jyldary salynǵanymen jańǵyrtý jumystarynan keiin jańa zaýyt dep aitýǵa tolyq kelmese de tehnologiialary qazirgi talaptarǵa sai. Zaýyt qazirgi ýaqytta Eýro standartpen K-4, K-5 markaly benzin shyǵarady. Degenmen ekologiiaǵa teris áserin tigizedi. Buzýshylyqtar da anyqtalady. 1 qarashada osy zaýyttan býlaný alańdaryna tolyq tazartýdan ótkizbei aǵyzylǵan tógindilerdi baiqadyq. Soǵan, jalpy ekologiiaǵa bailanysty biz jaqynda iri kompaniialardyń basshylarymen jiyn ótkizdik. Oǵan zaýyt basshylyǵyn da shaqyrdyq. Olarǵa ekologiia talaptaryn saqtaý, talapqa sai jumys isteý kerektigin taǵy eskerttik», - dedi Mahambet Dosmuhambetov Ortalyq kommýnikatsiialar qyzmetindegi baspsóz máslihaty barysynda BAQ ókilderiniń saýalyna orai.
Onyń atap ótýinshe, Atyraý munai óńdeý zaýytynda bolǵan oqiǵaǵa bailanysty tiisti tekserý jumystary Ekologiia departamenti tarapynan júrgizilip jatyr. Qajet bolǵan jaǵdaida Ekologiia ministriniń, «QazMunaiGaz» kompaniiasynyń jáne zaýyttyń basshylyǵynyń qatysýymen atalǵan máselege qatysty taǵy jiyn ótkiziledi. Sodan keiin tiisti sharalar qoldanylady.
«Al zaýytty qaladan kóshirýge qatysty aitar bolsam, ondai jospar joq. Zaýytty kóshirý máselesi ázirge qarastyrylmaidy», - dedi Atyraý oblysynyń ákimi.
