Jeńistiń 75 jyldyǵy qarsańynda Atyraý halyqaralyq áýejaiyna aty ańyzǵa ainalǵan ushqysh, Qazaqstannyń halyq qaharmany Hiaýaz Dospanovanyń esimi berildi, dep habarlaidy "Ult aqparat".
«Alty ministrlikten ruqsat aldyq. Áýejaiǵa qazaqtyń batyr qyzy Hiýaz Dospanovanyń esimin berý úshin respýblikalyq onomastikalyq komissiia resmi sheshim qabyldady», - dep málim etti oblystyq tilderdi damytý basqarmasy onomastika bóliminiń basshysy Jemis Diiasheva.
Hiýaz Qaiyrqyzy Dospanova 1922 jyly 15 mamyrda Atyraý oblysynda dúniege kelgen. Ekinshi dúniejúzilik soǵystyń ardageri, ushqysh, shtýrman-atqysh, Halyq qaharmany. 1940 jyly Oraldaǵy №1 orta mektebin úzdik bitirgen. Ushqyshtyq ómir jolyn Oral aeroklýbynda bastap, keiin soǵysqa attanady. Hiýaz Dospanova sol kezdiń ózinde teńdessiz erligi úshin «qanatty qyz» atanǵan.
Hiýaz qyzmet etken polk Soltústik Kavkaz, Kýban, Qyrym, Ýkraina, Belarýs, Polsha, Germaniia aspanyndaǵy shaiqastarǵa qatysqan. Qazaq qyzy qan maidanda 300-den asa jaýyngerlik operatsiia oryndap, asa mańyzdy jaý shebin talqandaidy.
2008 jyly 21 mamyrda Almaty qalasynda 86 jasynda dúnieden ozdy.
