Atyraý – Astrahan jolyn salyp jatqan jumysshylar úsh adamnyń qańqasyn taýyp aldy. Oqiǵa ornyna shaqyrylǵan politsiia qyzmetkerleri zirattyń qai ǵasyrǵa tiesili ekenin anyqtaý úshin sharalar oryndap, súiekterdi jer qoinaýyna qaita tapsyrdy, dep habarlaidy Sputnik.
Qańqalar Qurmanǵazy aýdany Jańatalap aýyldyq okrýginiń Kúigen aýylyna jaqyn jerden tabylypty. Jol qurylysy úshin topyraq qazyp jatqan jumysshylar adam súiekterine kez bolǵan.
"Úsh adamnyń súiegi beiit basynan alysta on metr tereńdikten tabyldy. "Aqtóbe-Atyraý-Astrahan" jolyn salyp jatqan "SineMidasStroi" merdiger uiymynyń ókilderi jumysty birden toqtatqan. Merdiger uiymnyń basshysy jumysty basqa ýchaskege aýystyrýdy tapsyrdy", - delingen "QazAvtoJol" UQ" AQ habarlamasynda.
Bastapqyda súiekterdi taýyp alǵan jumysshylar quqyq qorǵaý organdaryna habarlaýdyń ornyna videoǵa túsirip, áleýmettik jelide jariialapty. Jeli arqyly habardar bolǵan resmi bilik ókilderi oqiǵa ornyna aýdan ákimdigi men quqyq qorǵaý organdarynyń ókilderin jibergen.
Jergilikti turǵyndar bul jerde zirat bolǵanyn bilmeidi. Qańqalar on metr tereńdikte tabylǵandyqtan, júzdegen jyl buryn kómilgen shyǵar degen paiymdaý bar. Bul suraqtyń jaýabyn politsiia taǵaiyndaǵan saraptama berýi tiis.
Jumysshylarmen sóilesken aýdan ákimi Qairat Nurtaev budan bylai kez kelgen kútpegen jaitty jergilikti bilik ókilderine birden habarlaýdy surady.
Politsiia tiisti tergeý jumysyn bitirgen soń, tabylǵan súiekter eldi meken janyndaǵy ziratqa qaita jerlendi.
