Foto: wirestock/ Freepik
Atyraý oblysynyń prokýratýrasy jer qatynastary jáne sáýlet bóliminiń, sondai-aq Atyraý qalasy ákimi apparatynyń burynǵy basshylaryna qatysty qylmystyq istiń mán-jaiyn aitty, dep habarlaidy AtyrauPress saity.
Memleketke bir milliard teńgeden astam shyǵyn kelgen.
"Bul - jer qatynastary jáne sáýlet bóliminiń burynǵy basshylary jáne qazirgi Atyraý ákimi apparatynyń zań bólimi basshysy. Olar jer telimderin berý jáne olardyń nysanaly maqsatyn anyqtaý kezinde alaiaqtyq jasady degen kúdikke ilindi. Derekti prokýratýra organdary Qylmystyq kodekstiń 190-baby 4-bóligi 2-tarmaǵy ("Asa iri kólemde jasalǵan alaiaqtyq") jáne Qylmystyq kodekstiń 361-baby ("Qyzmettik ókilettikterdi teris paidalaný") boiynsha tirkedi", - dedi oblys prokýratýrasynyń ókilderi.
Qylmysqa kúdiktiler Atyraý qalasynyń bas jospary boiynsha turǵyn úi salýǵa tyiym salynǵan jáne qarastyrylmaǵan demalys aimaǵynan jeke turǵyn úi qurylysy úshin jer telimderin bergen. Keibir aýdandarda qurylys júrip jatyr.
"Burynǵy sheneýnikter bergen barlyq jer telimine buǵat qoiyldy. Memleketke bir milliard teńgeden asa shyǵyn keltirildi. Eki kúdikti qamaýǵa, úshinshisi úiqamaqqa alyndy.
Qylmystyq-protsestik kodekstiń 201-babyna sáikes, tergeý múddesin kózdeitin ózge de málimetter jariialanbaidy", - dep qorytyndylady qadaǵalaý organy.
Buǵan deiin habarlaǵanymyzdai, jer telimderin berý kezindegi alaiaqtyq áreketteri úshin jer qatynastary jáne sáýlet bóliminiń burynǵy basshylary, sondai-aq Atyraý qalasy ákimi apparatynyń qazirgi zań bóliminiń basshysy kúdikke ilingen.
