Qaraǵandyda biikten sekirýdi uiymdastyrǵan firmanyń birde-bir qyzmetkeri resmi túrde jumys istemegen. Bul týraly 34 jastaǵy Evgeniia Leontevanyń qaitys bolýna qatysty qylmystyq is boiynsha sottyń kezekti otyrysynda belgili boldy, dep habarlaidy QazAqparat.
Qaraǵandyda Qazybek bi aýdandyq sotynda 34 jastaǵy Evgeniia Leontevanyń qaza bolǵany týraly is boiynsha sot otyrysy jalǵasýda. Is materialdarynan belgili bolǵandai, «Fly Qazaqstan» firmasynyń direktory Ilia Ilichev óz JShS-in 2021 jyldyń jazynda tirkegen. Kompaniia biiktikten sekirýdi júzege asyrǵanyna qaramastan, barlyq qyzmetkerler onda beiresmi jumys istegen.
Qaiǵyly oqiǵa kezinde kompaniianyń iesi Ilia Ilichev Reseide bolǵan. Ol kezde ol anasyn jerleýdi uiymdastyrǵanyn jetkizgen. Alaida osydan keiin de «Fly Qazaqstan» direktory Qazaqstan aýmaǵyna oralmaǵan. Qzargi tańda Qazaqstan politsiiasy oǵan halyqaralyq izdeý jariialady.
Búgingi sot otyrysynda aiyptalýshy Aleksandr Mýznikas pen firmanyń taǵy bir qyzmetkeri «Fly Qazaqstanda» beiresmi jumys istegenderin moiyndady. Olar jalaqysyn kartaǵa aýdarý arqyly nemese Ekaterina Savitskaiadan alyp otyrǵandaryn jetkizdi.
Alaida ákimshi qyzmetin atqarǵan Ekaterina Savitskaia bul kompaniiada jumys istegenin moiyndamai otyr. Ol Ilia Ilichevpen dostyq qarym-qatynasta bolǵandyqtan, tek áleýmettik jelilerdi júrgizýge kómekteskenin jáne ol úshin aqsha almaǵanyn aitady.
Sondai-aq, otyrys barysynda nusqaýshylardyń arnaiy daiyndyǵy jáne oqytý týraly tiisti sertifikattary bolmaǵany belgili boldy. Búgingi protsesste 5 tehnik-nusqaýshylardyń biri Lev Glýhovskii jaýap berdi.
Onyń aitýynsha, ol «Fly Qazaqstanǵa» qyzmetkerlerdi qabyldaý týraly habarlandyrý boiynsha ornalasqan. Ilia Ilichevte eki ailyq taǵylymdamadan ótkenin aitady. Biraq arnaiy bilim alǵany týraly eshqandai qujatty qolyna almaǵan.
Sekirý kezinde klientpen 3 nusqaýshy jumys isteidi: joǵaryda bireýi jáne tómende ekeýi. Joǵarydaǵy nusqaýshynyń mindeti klientterdi sekirýge daiyndaý, arnaiy belbeýlerdi taǵý, aýyzsha nusqaý berý jáne signaldy kútkennen keiin adamdardy sekirýge jiberý bolǵan.
Jerdegi nusqaýshylardyń da óz mindetteri bar. Olardyń biri tejegish júiesin aǵashqa bekitip, klienttiń jaily túsýin qadaǵalaý bolsa, ekinshisi joǵarydan sekirgen adamdardy qarsy alyp, olardyń belbeýlerin sheshýi kerek. Sol kúni Lev Glýhovskii tejeý júiesin bekitýmen ainalysqan.
Glýhovskiidiń aitýynsha, sol kúni Aleksandr Mýznikas Evgeniia Leontevanyń salmaǵyn habarlamaǵan jáne onyń signalyn kútpesten klientke sekirýge ruqsat bergen. Aleksandr Mýznikas óz kezeginde Glýhovskii jumys ornyn tastap ketkenin, sondyqtan kabeldi bailap úlgermegenin aitty.
Eske sala keteiik, qaiǵyly oqiǵa ótken jyldyń 10 qazanynda oryn alǵan bolatyn.
Sottalýshy oryndyǵynda roýp-djamping nusqaýshysy otyr. Oǵan Qylmystyq kodekstiń 306-babynyń 3-bóligi (Abaisyzda adam ólimine ákep soqqan, tutynýshylardyń ómiri men densaýlyǵy qaýipsizdiginiń talaptaryna sai kelmeitin jumystardy oryndaý ne qyzmetter kórsetý) boiynsha aiyp taǵyldy.
Bul is boiynsha kelesi otyrys 5 mamyrda ótedi.
