Ataýly áleýmettik kómektiń ortasha mólsheri 105 myń teńgeni qurady. Bul týraly búgin halyqpen eseptik kezdesý ótkizip jatqan Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy QazAqparat tilshisi.
«2019 jylǵy 1 sáýirden bastap Elbasynyń tapsyrmasy boiynsha AÁK kórsetý sharttary ózgerdi, oǵan kómek taǵaiyndaý kriteriiin arttyrý, ár balaǵa eń tómengi kúnkóris deńgeiinen 70 paiyz nemese 20 789 teńge kóleminde kepildik berilgen ai saiynǵy kómek, otbasynyń jiyntyq tabysynan keibir járdemaqy túrlerin alyp tastaý kiredi. Nátijesinde búgingi kúni AÁK 277 myńnan astam otbasyǵa nemese 1,3 mln astam adamǵa tólendi. Jyl basynan beri 67,7 mlrd teńge somasynda AÁK tólendi, tólemniń ortasha mólsheri 105 myń teńgeni qurady», - dedi ministr.
Onyń aitýynsha, ákimdiktermen birlese otyryp, kómektiń 11 túrin qamtityn qyzmetterdiń biryńǵai paketi men áleýmettik qoldaý sharalary ázirlendi. Onyń ishinde 1-4 synyp oqýshylaryn tegin ystyq tamaqpen, mektep formasymen, oqýlyqtarmen jáne kerek-jaraqtarmen, balalar men analarǵa arnalǵan qoǵamdyq kólikte jeńildikti jol júrýmen, balalar lagerlerinde tegin demalýmen jáne taǵy basqalarmen qamtamasyz etý bar.
Eńbek ministri óz sózinde, balaly otbasylardy qoldaý sharalaryna nazar aýdardy. Máselen, ana men balany qoldaý maqsatynda bala týýǵa, 1 jasqa deiingi balany kútýge jáne júktiligi men bosanýy boiynsha áleýmettik tólemderge 243 mlrd.teńgeden astam qarajat bólinetin bolady.
Zeinetaqylardyń jetkilikti mólsherin qamtamasyz etý úshin dekrettik demalysta júrgen áielderge zeinetaqy jarnalary sýbsidiialanady. Aǵymdaǵy jyly osy maqsattarǵa 5,8 mlrd teńge kózdelgen. Qazirgi ýaqytta Qazaqstanda alty jáne odan da kóp balasy bar 237 myńǵa jýyq kópbalaly ana bar, olarǵa járdemaqy tóleýge jyl saiyn 45 mlrd teńge bólinedi.
«Sonymen qatar, QR Prezidenti Ákimshiligi basshysynyń tapsyrmasy boiynsha biz múddeli memlekettik organdarmen, qoǵam ókilderimen, belsendi azamattarmen birlese otyryp, «Baqytty bala - baqytty ana - baqytty otbasy - baqytty el» Jol kartasynyń jobasyn ázirledik», - dedi B.Saparbaev.
