Indýstriia jáne infraqurylymdyq damý ministri Beibit Atamqulov ýtilizatsiialyq alymdy damytý boiynsha jumys josparymen bólisti, dep habarlaidy QazAqparat.
«Úkimettiń bul baǵytta qabyldaǵan jumystarynyń basymdyqtary men kemshilikteriniń bárin tereń taldaýymyz kerek. Búgingi tańda ýtilizatsiialyq alym men Úkimet jasaǵan qadamdar Qazaqstandaǵy aýyl sharýashylyǵy tehnikasynyń óndirisin yntalandyryp otyr. Aýylsharýashylyq tehnikalary óndirisin yntalandyra otyryp, jańa óndiristi, jańa jumys oryndaryn quramyz», - dedi Beibit Atamqulov Úkimettiń baspasóz ortalyǵynda ótken brifingide.
Ministrdiń aitýynsha, 28 tamyzda nemistiń jetekshi «Claas» kompaniiasymen kelisim jasaldy.
«Biz jalpy, osy jumysty retteý úshin 10 jyldai eńbek ettik. Bul - óte salmaqty naryq. Aýyl sharýashylyǵy tehnikasynyń naryǵynda básekelester kóp. Bizdiń naryqta da olardyń kóptegen brendi bar. Bizge qoldaý bildirgen nemis seriktesterge alǵys aitamyz. Naryqtar aýqymyna qatysty qaýip baryna qaramastan, qazirdiń ózinde 200 kombain qurastyryla bastady», - dedi ministr.
Beibit Atamqulov bul rette, Úkimetten qoldaýdyń kerek bolǵanyn jetkizdi.
«Kelesi jyldan bastap birtindep lokalizatsiia baǵdarlamasyn bastap, ony 20-dan 40 paiyzǵa jetkizýdi kózdep otyrmyz. Jalpy, ýtilizatsiialyq alymǵa jumsap jatqan qarajat Qazaqstanda jańa jumys oryndaryp quryp jatqanyn erekshe atap ótkim keledi. Ekinshiden, Qazaqstanda jumys isteitin óndirýshilerge aýyl sharýashylyǵy ónimderi boiynsha lizing usynamyz. Osy jospar negizinde 22 myń aýyl sharýashylyǵy tehnikasy jańartylady. Bul jospardy bizdiń ministrlik aldaǵy úsh jylǵa qoiyp otyr. Álbette ýtilizatsiialyq alymǵa qatysty áli de pikirtalastyń artatyny anyq. Alaida, biz birinshi kezekte, qazaqstandyq óndirýshilerdi qoldaýymyz kerek», - dedi Beibit Atamqulov.
