Biyl Úkimet pen «Atameken» palatasy arasyndaǵy besjyldyq kelisimniń merzimi aiaqtalady. Osyǵan bailanysty bilik kásipkerler uiymynyń quramynan shyǵady. Al qazirgi áriptestik jańa kelisimniń negizinde jalǵasady, dep xabarlaidy QazAqparat tilshisi.
«Endi, ózderińiz jaqsy bilesizder, náreste dúniege kelgende ata-anasy ony álpeshtep ósiredi. Aiaǵyna turǵansha qamqorlyq jasaidy. Al aiaǵyna turyp ketken balanyń túisigi bolsa, ol ata-anasyna qamqorlyq jasaidy, ózine tirek bolady. «Atameken» bes jyldyń ishinde jyldap emes, kúnde ósti. Bes jylda júrip ótken jolyn qarańyzdar. Búginde «Atameken» Úkimettiń tiregine ainaldy. Bes jyl ótti. Endi, biz óz ókilettigimizdi toqtatyp, qazaqsha aitqanda «Atamekenniń» enshisin bólip berip, úlken jolǵa shyǵaryp otyrmyz. Bizdiń aitarymyz, aq jol!», - dedi QR Premer-Ministri Baqytjan Saǵyntaev «Atameken» UKP-nyń V sezinde.
Úkimet basshysynyń aitýynsha, bilik kásipkerler uiymynyń quramynan shyqsa da, áriptestik bailanys jalǵasa beredi.
«Osymen eki jaqqa ketemiz degen sóz emes. Kerisinshe, qazirdiń ózinde biz myqty komandaǵa ainaldyq. Men bir ǵana mysal keltireiin, Eýraziialyq ekonomikalyq komissiianyń jumysy kezinde qyzý pikirtalastar bolyp jatady. Sonda áriptesterimizge salmaqty bir ýáj tappai qalǵanda biz «Atameken» qarsylyq bildirdi deimiz de, boldy. Osymen pikirtalas basylady. Áriptesterimiz bolsa, bundai «Atamekendi» qaidan alsaq eken dep shyǵady. Sebebi bári bir nárseni jaqsy biledi. Odaq aiasyndaǵy kez kelgen jumys bizneske tiimdi bolýy qajet», - dep atap kórsetti B.Saǵyntaev.
Sezd barysynda Úkimet pen «Atameken» UKP arasynda jańa kelisimge qol qoiyldy. Sonyń negizinde bilik pen biznestiń áriptestik bailanystary jalǵasa beredi. Biraq uiymnyń quryltaishylar quramynda tek kásipkerler ǵana qalady.
«Osymen ózara is-qimyldyń tetikteri belgilendi. Biz jemisti ári tiimdi jumystyń jalǵasa beretinine senemiz. Shynymen de, bes jyldyń ishinde Úkimet laiyqty ári kásibi áriptesin tárbielep shyǵardy. Birlesken jumystyń nátijesinde biraz sharýalar atqaryldy. Atalǵan áriptestik jalǵasa beredi», - deidi «Atameken» UKP prezidiým tóraǵasy Timýr Qulybaev.
Aita keteiik, bes jyldyń ishinde «Atamekenge» biznesti qorǵaý boiynsha 23 573 aryz-shaǵym túsken. Sonyń 40 protsenti oń sheshimin tapty. Sonyń nátijesinde kásipkerlerdiń menshik quqyǵy 111,3 milliard teńgeden astam somaǵa qorǵaldy. 2016 jyly Qazaqstannyń biznes-ombýdsmen institýty engizildi. Quqyq qorǵaý organdary tarapynan kásipkerlerge jasalatyn qysym deńgeii aitarlyqtai tómendedi. Ekonomikalyq qylmysty alǵash ret jasaǵan ári óz erkimen zalaldy ótegen tulaǵalardy jaýapkershilikten bosatý tetigi engizildi. 2016-2017 jyldary jasalǵan raqymshylyq sharalarynyń arqasynda 400-den astam kásipker ekonomikalyq qyzmetke qaita oraldy.
Ulttyq kásipkerler palatasynyń bastamasymen daýlardy sotqa deiin retteý mehanizmi engizildi. QR Qarjy ministrliginiń janynan salyq jáne keden daýlary boiynsha apelliatsiialyq komissiia quryldy. Búginge deiin salyq jáne keden tekserýlerine qatysty 157 shaǵym qaralyp, shamamen 40% biznestiń paidasyna sheshildi.
Palata qurylǵannan beri 22 300 normativti quqyqtyq aktiniń jobasyna saraptama jasaldy, onyń ishinde 434-ten astam zań jobasy qaraldy. Biznestiń usynystaryn eskerý kórsetkishi aitarlyqtai ósti. 2015 jyly 30 protsent bolsa, biyl usynystardyń 73 protsenti eskerildi. Úkimetpen birge 800 ruqsat qysqartyldy (1115 bolǵan, qazir 315-i qaldy). Budan kásipkerler jyl saiyn 1,5 mlrd teńgeni únemdeidi.
2016 jyly «Atameken Services» jobasy iske qosyldy. 76 qyzmet avtomattandyryldy. Onlain rejimde 18 myńnan astam qyzmet kórsetildi. Osynyń negizinde «Bizneske arnalǵan úkimet» jobasyn júzege asyrý josparlanǵan. Budan bólek, «Bastaý Biznes» jobasy aiasynda xalyqty bizneske úiretý sharalary qolǵa alyndy. 2017 jyly 15 myń jumyssyz jáne ózin-ózi jumyspen qamtyǵan azamat oqytyldy. Onyń ishinde 8 myńnan astamy biznes-jobalaryn qorǵady, 3314 azamat biznesin ashty jáne ulǵaitty. Shamamen 10 myń jumys orny ashyldy. Biyl 30 myń adam oqytalady.
