Sáken Seifýllin atyndaǵy Qazaq agrotehnikalyq ýniversitetiniń professory, ekonomika ǵylymdarynyń kandidaty Qairat Bodaýhan shet elderden kóship kelgen qandastardyń qai óńirlerge qonystanatynyn aityp berdi, dep habarlaidy QazAqparat.
«2012 jyly oralmandar úshin 2011-2014 jyldarǵa arnalǵan kvota aiqyndaý týraly Úkimet qaýlysy keri qaitaryp alyndy. Máselen 2012-2017 jyldary etnikalyq qazaqtardy qonys aýdarýǵa kvotalar múldem belgilenbedi. Alaida, osy jyldarda el aýmaǵyna memlekettiń eshbir qoldaýynsyz, óz múmkinshilikterimen 120 303 qandas kelip, ornalasqan», - dedi Qairat Bodaýhan «Otandastar qory» KEAQ janyndaǵy qoǵamdyq komissiianyń otyrysynda.
Onyń aitýynsha, demografiialyq ahýaly tómen dep esepteletin bes óńir – Aqmola, ShQO, Qostanai, Pavlodar jáne Soltústik Qazaqstan oblystaryndaǵy kóshi-qon jaǵdaiy alańdatyp otyr. Sońǵy bes jylda atalmysh óńirlerdegi syrtqy kóshi-qon saldosy - 87 633, ishki kóshi-qon saldosy - 86 098 adamdy qurap otyr.
«Al qazirgi kezeńde QR Úkimetiniń 2016 jylǵy 18 aqpandaǵy № 83 qaýlysyna sáikes otandastardy qonystandyrý úshin 7 óńir tańdaldy, olar – Aqmola, Batys Qazaqstan, Atyraý, Qostanai, Shyǵys Qazaqstan, Pavlodar jáne Soltústik Qazaqstan oblystary. Osy sheshim negizinde 2017 jyldan bastap kvotalar otbasy sanymen emes, adam sanymen belgilenedi», - dedi Q. Bodaýhan.
