«Atameken» UKP men «Otandastar qory» kommertsiialyq emes aktsionerlik qoǵamy arasynda ózara túsinistik jáne yntymaqtastyq týraly memorandým jasaldy. Kelisimge «Otandastar qory» KEAQ prezidenti Nurtai Ábiqaev pen palatanyń Basqarma tóraǵasy Abylai Myrzahmetov qol qoidy, dep habarlaidy "Ult aqparat".
Aita keteiik, «Otandastar qory» - shet elderde turatyn etnikalyq qazaqtar men otandastardy qoldaý jumysy boiynsha memlekettik organdar jáne úkimettik emes uiymdarmen naqty baǵyttardy aiqyndap, seriktestik ornatatyn uiym. Al memorandým «Atameken» UKP men qordyń birqatar baǵytta tyǵyz bailanysta jumys atqarýy úshin negiz bolyp tabylady. Máselen, «Atameken» ózinde jinaqtaǵan kásipkerlik týraly bilim bankin paidalaný, biznes qurý jáne damytý, palata júzege asyratyn baǵdarlamalar boiynsha oqytý, investorlar men startaptardy izdeý baǵytynda qoldaý jasaidy.
Sonymen qatar yntymaqtastyq aiasynda «Meniń Atamekenim» jáne biznes salasyndaǵy sheteldik qazaqtar uiymdaryn álem boiynsha bir jelige biriktiretin «Atameken» Iskerlik úii» jobasyn iske asyrý máseleleri de qamtyldy. Etnikalyq qazaqtardyń tarihi otanyna kóshýin yntalandyrýdy qarastyratyn «Temirqazyq» baǵdarlamasyna derbes basymdyq beriledi.
«Otandastar» qory men «Atameken» UKP birlesken jumysynyń aldaǵy baǵyttary «Otandastar. Bolashaqqa baǵdar» atty halyqaralyq dóńgelek ústel aiasynda ótetin «Atameken» Iskerlik úiiniń» paneldik sessiiasynda naqtylanady. Atalǵan shara biyl 28 qarashada Nur-Sultan qalasynda ótedi. Jiynǵa 20 eldegi qazaq diasporasynan 150 delegat qatysady.
