«Atameken» ulttyq kásipkerler palatasy kásipkerlerge kelgen zalaldy óteýge InfoKazakhstan.kz platformasynda elektrondy ótinimderdi qabyldai bastady, dep habarlaidy QazAqparat.
«Atameken» ulttyq kásipkerler palatasynyń málimetinshe, bul shara Úkimet bekitken 2022 jylǵy qańtardaǵy jekelegen óńirlerdegi tártipsizdikter saldarynan shaǵyn jáne orta kásipkerlik sýbektilerine kelgen múliktik zalaldy óteý mehanizmine sáikes iske asyrylady.
Eske salsaq, zalaldy óteý týraly ótinish ETsQ kómegimen infokazakhstan.kz saity arqyly beriledi.
Mehanizmge sáikes zalaldy óteý týraly ótinishterdi óńirlik komissiialar kúntizbelik 5 kún ishinde qaraidy.
Ótinish maquldanǵan jaǵdaida usynylǵan málimetter men qujattar negizinde óńirlik komissiia aiqyndaityn mólsherde qarajat bólý týraly sheshim shyǵarylady.
Qarjy Qazaqstan Respýblikasynyń biýdjettik rásimderine sáikes múlik iesiniń ótinishinde kórsetilgen aǵymdaǵy nemese jinaq shotyna tiisti sheshim qabyldanǵan kúnnen bastap bir ai ishinde ótinish berýshige aýdarylady dep boljanady.
«Zardap shekken kásipkerlerdiń nazaryna! Zalaldy óteýge ótinish berer aldynda osy siltemege kirip, nusqaýlyqpen tanysýyńyzdy suraimyz, sondai-aq qajetti qujattardyń tolyqtyǵyna kóz jetkizý kerek. Qujattar toptamasy tolyq usynylmaǵan jaǵdaida óńirlik komissiia múliktik zalaldy óteýden bas tartý týraly sheshim shyǵarady. Kásipkerlerge yńǵaily bolý úshin «Atameken» UKP zalaldy óteý boiynsha is-qimyl algoritmin daiyndady. Onda zalaldy óteýge ótinish berý qadamdary sipattalǵan» delingen «Atameken» UKP taratqan habarlamada.
