Elimizde 60-tan astam joǵary oqý ornyn bitirgen túlekterdiń 50%-i jumyssyz. Bul - elimizdegi ýniversitetterdiń bilim berý deńgeiiniń sapasyzdyǵyn kórsetedi.
Bul jóninde búgin «Atameken» UKP Basqarma tórǵasynyń orynbasary Oljas Ordabaev JOO ókilderimen ótken jiynda málimdedi.
«D.Qonaev atyndaǵy Eýraziialyq zań akademiiasynda Halyqaralyq qatynastar mamandyǵy boiynsha oqyǵan túlekterdiń 71%-y jumyssyz, al Halyqaralyq gýmanitarlyq-tehnikalyq ýniversitetinde informatika mamandyǵyn bitirgender de óndiriske qajetsiz mamandar qatarynda. Óńirlik áleýmettik-innovatsiialyq ýniversitetinde Kásiptik oqytý mamandyǵyn bitirgenderdiń 25%-y ǵana qyzmetke qol jetkizse, Ortalyq Aziia ýniversitetinde ekonomika mamandyǵy boiynsha jumysqa turǵandar nebári 20%», - dedi ol.
Bul kórsetkish «Atameken» Ulttyq kásipkerler palatasynyń úsh jyl qatarynan QR Bilim jáne ǵylym ministrligimen birlesip, qazaqstandyq joǵary oqý oryndarynyń bilim berý baǵdarlamalaryna táýelsiz baǵalaý júrgizý nátijesinde belgili bolyp otyr.
«Reiting 2019 jyly 17 kriterii boiynsha júrgizildi, olardyń ishinde: eńbekpen qamtylǵan túlekterdiń paiyzy jáne olardyń ortasha ailyq eńbekaqysy, oqý aiaqtaǵan soń jumys izdeý uzaqtyǵy, sondai-aq, baǵdarlamalardyń ózektiligin baǵalaý bar», – dedi ol.
Sonymen birge, qazirgi tańda joǵary synyp oqýshylarynyń basym kópshiligi mamandyq tańdaýda qinalady, buǵan eńbek naryǵyna qajetti mamandyqtar týraly aqparattardyń joqtyǵy sebep. Sonyń saldarynan, joǵary bilimdi azamattardyń basym bóligi basqa salada jumys isteýge májbúr. Bul mamandyq tańdaýdaǵy qateliktiń kórinisi. Al atalǵan reiting osy qajettilikti qanaǵattandyrý úshin jasalyp otqan kórinedi.
«Qazirgi tańda, jumys berýshilerdi de bilim baǵdarlamalarynyń ózektiligi alańdatady. Jalpy alǵanda jumys berýshilerdiń 68 paiyzy qazirgi oqý baǵdarlamasyna kóńilderi tolmaidy», - dedi O.Ordabaev.
Sondai-aq, jiyn barysynda Qazaqstandaǵy eń nashar ýniversitetter tizimi ataldy. Olar:
SilkWay Halyqaralyq ýniversiteti
Syrdariia Ýniversiteti
Halyqaralyq gýmanitarlyq-tehnikalyq ýniversiteti
Óńirlik áleýmettik-innovatsiialyq ýniversitet
Ortalyq Aziia ýniversiteti
Shymkent ýniversiteti
Astana Ýniversiteti
