Qyrǵyzstan áskeri prokýratýrasy eldiń eks-prezidenti Almazbek Atambaevqa taǵy eki aiyp taqty. Bul týraly onyń advokaty Sergei Slesarev habarlady, dep jazady Azattyqtyń Qyrǵyz qyzmeti.
Advokattyń sózinshe, Atambaevqa eki aiyp Bishkek JES jóndeý jumystary men el astanasyndaǵy "Forým" ǵimaratyn jekeshelendirý kezindegi jemqorlyq isi boiynsha taǵylǵan. Slesarev Atambaev jańa aiyptar taǵylǵanynan habardar ekenin aitty.
8 tamyzda Qyrǵyzstannyń kúshtik qurylymdary Koi-Tashta júrgizgen ekinshi operatsiiadan keiin eldiń burynǵy prezidenti Almazbek Atambaevty ustady.
7 tamyzda bolǵan alǵashqy operatsiia sátsiz aiaqtalǵan edi. Operatsiia saldarynan týyndaǵan tártipsizdik kezinde ondaǵan adam jaralandy, bir adam qaza tapty. 8 tamyz kúngi janjal kezinde de birneshe adam jaralanǵan. Olardyń tórteýi - politsei.
Keiin eldiń kúsh qurylymdary Atambaevqa "tártipsizdikter uiymdastyrý", "zańsyz qarý ainalymy", "tergeýge kedergi jasaý", "kepilge adam alý", "kisi óltirý" jáne "adam óltirýge oqtalý" baptary boiynsha aiyptar taǵyp, qamaýǵa alǵan.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady. Úsh ret shaqyrtý jibergenimen tergeýge barmaǵan Atambaevty ministrlik arnaiy operatsiia júrgizip, kúshtep ákelýdi tapsyrǵan.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitqan. Bishkek bul aiyptardyń saiasi astary bar degenmen kelispeidi.
Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
