Qyrǵyzstanda Koi-Tashtaǵy jappai tártipsizdik jáne sarbazdardy kepildikke alý isi boiynsha kúdiktilerge sot-psihiatriialyq saraptama taǵaiyndaldy. Olardyń arasynda burynǵy prezident Almazbek Atambaev ta bar.
Ishki ister ministrliginiń dereginshe, sotqa deiingi tergeý amaldary aiasynda 16 adam kúdikti retinde tanylǵan. IIM habarlamasynda olardyń aýyr jáne óte aýyr qylmys jasady degen kúdikke ilingeni jazylǵan. Qyrǵyzstan zańyna sáikes, mundai jaǵdaida kúdikke ilingen azamattar sot-psihiatriialyq saraptamadan ótýi tiis.
7-8 tamyzda Qyrǵyzstannyń Shý oblysy Alamýd aýdany Koi-Tash aýylynda arnaiy qyzmet ókilderi burynǵy prezident Almazbek Atambaevty tergeýge kúshtep aparýǵa tyrysty. Oqiǵa kezinde ondaǵan adam zardap shekti, arnaiy qyzmettiń alty jasaǵyn Atambaev jaqtastary kepilge alyp, 20 saǵat boiy Atambaev úiinde ustady. Memlekettik ulttyq qaýipsizdik komitetiniń jasaǵy Ýsenbai Niiazbekov aýyr jaralanyp, qaitys boldy. Shý oblysynyń ishki ister basqarmasynyń bastyǵy Samat Kýrmankýlovtyń basy jaralanyp, qazir Máskeýde emdelip jatyr.
8 tamyzda Qyrǵyzstannyń kúshtik qurylymdary Almazbek Atambaevty ustady. Keiin Atambaevqa "tártipsizdikter uiymdastyrý", "zańsyz qarý ainalymy", "tergeýge kedergi jasaý", "kepilge adam alý", "kisi óltirý" jáne "adam óltirýge oqtalý" baptary boiynsha 14 aiyp taǵylyp, qamaýǵa alyndy.
Koi-Tashtaǵy oqiǵadan soń kóp keshikpei Atambaev jaqtastary - prezident apparatynyń burynǵy jetekshisi Farid Niiazov, partiia boiynsha áriptesteri Alga Kylychov, Kyiaz Smailov jáne Amantýr Jamgyrchiev qamaýǵa alyndy. Olar "arnaiy jasaq ókilderin kepilge aldy" degen kúdikke ilingen. Dál osyndai kúdikpen depýtat Irina Karamýshkina da 22 tamyzda úiqamaqqa alynǵan.
