Qyrǵyzstannyń burynǵy prezidenti Almazbek Atambaev ózin tiispeýshilik mártebesinen aiyrǵan parlament sheshimine qatysty pikir bildirdi.
Keshe, 27 maýsymda parlament eks-prezident Almazbek Atambaevty tiispeýshilik mártebesinen aiyrǵan. Osylaisha, tergeý organdary Atambaevty ustap, ony tergeýge quqyq alǵan. Bas prokýratýra eks-prezidentke taǵylǵan jemqorlyq, zańsyz baiý jáne laýazymyn asyra paidalaný siiaqty aiyptarǵa negiz tapqan.
Koi-Tash aýylyndaǵy úiinde jýrnalister suraǵyna jaýap bergen eks-prezident ózine aitylǵan aiyptardy joqqa shyǵardy. Ol "qylmystyq is qozǵalǵan jaǵdaida tergeýge barmaimyn" dedi.
- Advokatym bar. Prokýrorlardyń suraǵy bolsa, jazbasha jaýap beremiz. Maǵan aitylyp jatqan aiyptardyń bári - jala. Tergeýdiń qalai júrip jatqanyn kórip turmyz ǵoi, - dedi Atambaev.
Burynǵy prezident Qyrǵyzstannyń "zań sheńberinen shyǵyp ketkenin" aitty. Atambaevtyń sózinshe, "qazirgi bilik óz adamdaryn ǵana qorǵap, ózine jaqpaǵandardy kez kelgen syltaýmen túrmege jaýyp tastaidy".
Eks-prezident basqa elge kóshpeitinin aitty. "Bul - meniń otanym. Qashatyn - basqalar. Meni qurtýdy kózdegender erte me, kesh pe ózderi qashady. Sózime sen" dedi jýrnalisterdiń birine Atambaev.
Azattyqtyń Qyrǵyz qyzmeti jýrnalisiniń "Qazirgi prezident Sooronbai Jeenbekovke kózqarasyńyz qandai?" degen suraǵyna eks-prezident "Men ony moiyndamaitynymdy buǵan deiin de aitqanmyn. Onyń qanshalyqty zańdy prezident ekeni úlken kúmán týdyrady" dep jaýap berdi.
Byltyr Qyrǵyzstanda ótken prezident sailaýy kezinde Jeenbekovke qoldaý kórsetkeni týraly aitqandarǵa Atambaev "jańylmaityn adam joq" dep jaýap berdi.
- Paiǵambar "men de adammyn, men de qatelesemin" degen. Al men - paiǵambar emespin. Ainalamdaǵy dostaryma qarańdarshy. Eń jaqyn dosymnyń biri - Sooronbai Jeenbekov, ekinshisi Isa Omýrkýlov edi. Biraq men adamdardyń alda ne isteitinin boljap bile almaimyn, - dedi burynǵy prezident.
Atambaevqa depýtattar taǵyp, Bas prokýratýra negizdi dep tapqan aiyptar mynalar:
- Atambaev úi salǵan Koi-Tash aýylynda jerdi zańsyz basyp alý;
- Qylmystyq top múshesi Aziz Batýkaevty zańsyz bosatý;
- Zańsyz baiý;
- Bishkek TETs-in jańartý jobasy kezindegi jemqorlyq áreket;
- Bishkek TETs-ine zańsyz kómir tasymaldaý isine qatysy bolýy múmkin.
Qyrǵyzstanda burynǵy prezident mártebesine Roza Otýnbaeva men Almazbek Atambaev ie. Al halyq tolqýlary nátijesinde bilikten ketýge májbúr bolǵan eldiń birinshi prezidenti Asqar Aqaev pen ekinshi prezidenti Qurmanbek Bakievke ondai mártebe berilmegen.
