Qyrǵyzstan prezidenti Almazbek Atambaev Qyrǵyzstan qarýly kúshteri bas shtabynyń basshysy Raiimberdi Dýishenbievke el shekarasyn nyǵaityp, qorǵanys qabiletin kúsheitýge tapsyrma berdi, dep habarlaidy qyrǵyzstandyq resmi baspasóz.
Atambaevtyń baspasóz qyzmeti 8 qarashada Dýishenbiev Atambaevtyń qabyldaýynda bolyp, oǵan Qyrǵyzstannyń qorǵanys áleýetin nyǵaitý, qarýly kúshterdi damytý jumystary men áskeri qyzmetkerlerdiń áleýmettik qamsyzdandyrylýy jáne tehnikalyq jaraqtandyrylýy boiynsha jasalyp jatqan jumystar jóninde aityp bergenin habarlady.
Dýishenbiev sonymen qatar memlekettik shekara qyzmetiniń áskerilerine arnalǵan kóp qabatty eki úi salynyp bitkenin jáne Batken oblysynda "Minbýlak" zastavasyn ashýǵa daiyndyq jasalyp jatqanyn aitty.
Prezident Atambaev qyrǵyz armiiasynyń qazirgi jaǵdaiyn óziniń prezident bolǵan alty jylda jetken jetistikteriniń biri sanaidy. Mamyrdyń sońynda Qyrǵyzstan qarýly kúshteriniń qurylǵanyna 25 jyl tolýyna arnalǵan sharada sóilegen Atambaev "armiiaǵa reforma jasalǵanyn" jáne onyń qazir eldi qorǵai alatyn dárejede ekenin málimdegen.
