«EcoAlmaty» JShS jetekshisi Janna Asanova Almatydaǵy «Atakent» iskerlik ortalyǵynda 9 myń aǵash tamyrymen joiylady degen qaýesetti joqqa shyǵardy. Bul týraly ol Facebook paraqshasynda jazdy, dep habarlaidy QazAqparat tilshisi.
«Jasyl ekonomika basqarmasynan 9 myń aǵashty otaý týraly ótinimniń túskeni jaily aqparat jalǵan. Jasyl jelek otyrǵyzý men ósirý erejesi boiynsha Almatyda taldar tek jasyl ekonomika basqarmasynyń ruqsatymen ǵana otalady. Merdiger kompaniia otalǵan aǵashtyń ornyna 5 ese kóp shybyq otyrǵyzýǵa mindetteledi. Aǵashty kesýge ruqsat qujaty E-gov elektrondy portaly jáne HQO arqyly beriledi. Al «Atakent» ortalyǵy boiynsha ázirge eshqandai ótinish túsken joq», - dedi Janna Asanova.
Onyń aitýynsha, dál qazir Atakent aýmaǵynda aǵashtardy sanitarlyq qysqartý júrgizilip jatyr. Ol úshin ruqsat qujattary talap etilmeidi.
Kórme kesheni parkindegi jasyl jelekti otaý týraly qaýeset Facebook-te taralǵan bolatyn.
Munyń aldynda «Atakent» jańa prezidenti Madina Maqypova keshen territoriiasynda kongress-ortalyq ashylatynyn habarlaǵan edi.
«Kongress-ortalyq salynatyn aýmaq – saiabaq, aǵashtar. Bizge jasyl ekonomika basqarmasynan merdiger kompaniia hat jazdy. Olardyń jospary boiynsha kongress-ortalyq park aimaǵynda ornalasýy tiis eken. 54 ga aýmaǵymyzdyń 30 ga solarǵa berýimiz kerek. Qazir bul kelisim tirkelip jatyr», - dedi Madina Maqypova.
«Atakent» baqylaý keńesiniń múshesi Rýslan Hen aitqandai, kongress-ortalyq 8 ga aýmaqty alsa, qalǵan 22 ga jerde kólikterge yńǵaily bolý úshin jol airyǵy jasalady.
