Almatylyq Ahmetjanovtar úshin Otbasy kúniniń orny bólek. Otbasy – syilastyq, jarastyq ornaǵan orta, kishkentai Otan. Ol baǵa jetpes qundylyq dep esepteidi úsh balanyń ákesi Baǵdat Ahmetjanov.
Baǵdat Ahmetjanov ata-anasynan erte aiyrylǵan. Sondyqtan ol úshin otbasynyń orny erekshe.
«Men ata-anamnan 14 jasymda aiyrylyp qaldym. Ekeýi de kólik apatynan kóz jumdy. Biz eki aǵaiyndymyz. Saǵdat degen inim bar. Bizdi anamnyń sińilisi eshkimnen kem etpei ósirdi, tárbieledi, oqytty. Ol kisige aitar alǵysymyz sheksiz»,– deidi Baǵdat Ahmetjanov.
Onyń aitýynsha, otbasy - baǵa jetpes qundylyq. Ony saqtap, qurmetteý ár adamnyń basty mindeti.
«Men 2015 jyly 21 jasymda úilendim. Qazir úsh balanyń ákesimin. Eki ul, bir qyzym bar. Otbasy – Alla syilaǵan keremetterdiń biri. Otbasynda adam boiyndaǵy asyl qasietter jarqyrai kórinip, qalyptasady. Jaqyndaryna, týǵan-týysqandaryna degen súiispenshilik artady. Biz otbasyn Otannyń kishkentai bir bólshegi retinde qarastyramyz»,– deidi ol.
Baǵdat Ahmetjanov «Almatyjylýjaienergo» jaýapkershiligi shekteýli seriktestiginde operator bolyp jumys isteidi, jary Aqmaral Dúisenova jekemenshik kompaniialardyń birinde esepshi. Jaqynda jas otbasy «Almaty jastary» baǵdarlamasy boiynsha baspanaly boldy.
«Qazir jastarǵa arnalǵan baǵdarlamalar óte kóp. Búgingi kúni bizde sol memleket tarapynan beriletin jeńildikterdiń jemisin kórip otyrmyz. Jumys isteitin jastarǵa arnalǵan jaldamaly baspana baǵdarlamasy aiasynda bir bólmeli páterge ie boldyq. Bul biz úshin úlken kómek. Endigi maqsat óz baspanamyzǵa qarjy jinaý. Jalpy jumys isteitin jastarǵa múmkindikter barshylyq»,– deidi úsh balanyń ákesi.
