Májilis depýtaty Berik Bekjanov dándi daqyldardy tasymaldaý qunynyń ósýine bailanysty oryn alǵan problemany kóterdi, dep habarlaidy QazAqparat.
«Eldiń altyn qory – astyqtan daiyndalatyn áleýmettik mańyzy bar azyq-túlik ónimderi baǵasynyń ósýi dándi daqyldardy tasymaldaý qunynyń ósýine de bailanysty ekeni qupiia emes. Óndirýshilerdiń aýyl sharýashylyǵy ónimderine 2020 jylǵy baǵa indeksi 115,3 paiyzdy qurasa, ósimdik sharýashylyǵy ónimderine baǵa 17,6 paiyzǵa ósken. Onyń ishinde dándi daqyldar baǵasynyń ósýi 18,8 paiyz bolsa, ósimdik sharýashylyǵyndaǵy óndirýshiler baǵasynyń ózgerýi sońǵy bes jylda 67,6 paiyzdy quraidy», - dep toqtaldy depýtat Májilistiń jalpy otyrysynda QR Básekelestikti qorǵaý jáne damytý agenttigi tóraǵasynyń atyna joldaǵan saýalynda.
Onyń aitýynsha, baǵanyń ósýine áser etetin faktorlardyń biri - shikizatty óńdeýshi kásiporynǵa deiin tasymaldaý. Eldegi astyq tasymaldaý naryǵynda «Astyq Trans» aktsionerlik qoǵamy basymdyqqa ie, atalǵan zańdy tulǵa temirjol kóligindegi barlyq astyq tasymalynyń 50 paiyzǵa jýyǵyn qamtidy. 2020 jyly bul kompaniia ishki astyq tasymaldaý kóleminiń 74 paiyzyn jáne barlyq eksporttyq astyqtyń 40 paiyzyn tasymaldaǵan.
«Qazaqstan naryǵynda ústem jaǵdaiyn paidalanyp, bul kompaniia óz qyzmetteriniń qunyn birneshe ese arttyryp otyr. Atap aitqanda, sońǵy bes aida tasymaldaý quny tórt ese artyp, bir vagon úshin tasymaldaý baǵasy orta eseppen 60 myń teńgege qymbattaǵan.
Mysaly, ótken jyldyń qyrkúiek aiynda dándi daqylardy elimizdiń soltústiginen ońtústikke jetkizý quny bir vagonǵa 471 425 teńgeni qurasa, aǵymdaǵy jyldyń qańtar aiynda 537 148 teńgege deiin ósken. Aiyrmashylyǵy - 65 723 teńge», - dedi B. Bekjanov.
Onyń sózine qaraǵanda, dándi daqyldardan daiyndalatyn jem baǵasynyń ósýi mal sharýashylyǵy ónimderiniń qunyna áser etetini daýsyz. Ótken jyly onyń baǵasy 4,2 paiyzǵa kóterilgen.
«Astyq tasymaldaý boiynsha kólik qyzmetteri tarifteriniń osyndai kóterilýine sebep bolatyn faktorlarǵa erekshe nazar aýdarý kerek dep sanaimyz. Quzyretti organdar astyq tasymaldaý boiynsha ústem jaǵdaiǵa ie sýbektilerge zań aiasynda baqylaýdy júzege asyrýǵa tiis. Osyǵan bailanysty, Agenttik tarapynan elimizde astyq tasymaldaý tarifterine monitoring júrgizý kerek.
Ekinshiden, «Astyq Trans» aktsionerlik qoǵamy tarapynan astyq tasymaly baǵasynyń ósý faktisiniń zańdylyǵy men negizdiligine quqyqtyq turǵydan baǵa bergen jón», - dedi Berik Bekjanov.
