QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda 2020 jylǵy egin jinaý jumystarynyń barysy qaraldy, dep habarlaidy "Ult aqparat".
Qazirgi tańda elimizde egin jinaý jumystarynyń 93%-dan astamy oryndalǵan. Ónim kólemi 18 mln tonna astyq deńgeiinde josparlanyp otyr. Ónimdilik — 12,3 ts/ga. Jańa ónimniń eksporttyq áleýeti shamamen 7,5-8 mln tonnany quraidy.
«Jahandyq úrdiske qaraǵanda álemdik naryqta azyq-túlikke degen suranys pen baǵa tek arta bermek. Sondyqtan bizdiń basym mindetimiz – astyq ósirý men odan jasalatyn ónimder eksportynyń kólemin aitarlyqtai ulǵaitý.
Bizde joǵary sapaly nan ónimderiniń óndirisimen qatar, astyqty tereń óńdeý úlgileri de bar. Atap aitqanda, gliýten, krahmal jáne bioetanol óndirisi. Jalpy, elimizde astyq jáne odan jasalatyn ónimderdiń eksporttyq áleýeti óte joǵary. Osy áleýetti barynsha iske asyrýymyz qajet», — dedi Mamin.
Úkimet basshysy Aýyl sharýashylyǵy ministrligine dándi jáne burshaqty daqyldardy qaita óńdeý salasyn damytý, sondai-aq eksporttyq áleýetti arttyrý boiynsha jol kartasyn ázirleýdi tapsyrdy.
Ákimdikter men Aýyl sharýashylyǵy ministrligine qysqa merzim ishinde astyq jinaý jumystaryn aiaqtap, eginniń saqtalýyn qamtamasyz etý, astyqqa satyp alý baǵasyn belgileý jáne naryq qatysýshylaryn habardar etý, forvardtyq satyp alý tetigi aiasynda qarajattyń qaitarylýyn qamtamasyz etý tapsyryldy.
Indýstriia jáne infraqurylymdyq damý ministrligine «QTJ» UK» AQ-men birlesip, astyqty úzdiksiz tasymaldaý úshin jyljymaly qurammen qamtamasyz etý sharalaryn qabyldaý tapsyryldy.
Aita keteiik, jiynda Aýyl sharýashylyǵy ministri S. Omarov, Aqmola oblysynyń ákimi E. Marjyqpaev, Qostanai oblysynyń ákimi A. Muhambetov, Soltústik Qazaqstan oblysynyń ákimi Q. Aqsaqalov, sondai-aq atalǵan óńirlerdiń agrobiznes ókilderi — «Logos Grein» JShS basshysy A. Qudaibergenov, «Qarqyn» agrofirmasy» JShS basshysy E. Buqanov, «Biooperations» JShS basshysy Á. Talǵatbek baiandama jasady.
