Reseidiń Astrahan qalasynda Dina Nurpeiisovanyń 160 jyldyq mereitoiyna orai shyǵarylǵan «Túrki áleminiń uly kompozitory» kitabynyń tusaýkeseri ótti. Bul týraly Qazaqstannyń RF-daǵy Elshiliginen málim etti, dep habarlaidy QazAqparat.
Qazaqtyń kórnekti kompozitory, dombyrashy, Qazaq KSR-niń halyq ártisi Dina Nurpeiisovanyń 160 jyldyq mereitoiyna arnalǵan shara Qurmanǵazy atyndaǵy Astrahan óńirlik mádeniet ortalyǵynda ótti.
Qazaq, orys, túrik, aǵylshyn tilderinde jaryq kórgen kitapta kúishi ómiri týraly buryn-sońdy jariialanbaǵan biregei derekter qamtylǵan.
Is-sharany Astrahandaǵy QR Bas konsýldyǵy Astrahan oblysynyń halyqaralyq bailanystar agenttigi men mádeniet jáne týrizm ministrliginiń qoldaýymen uiymdastyrdy.
Tusaýkeser qonaqtary - ǵalymdar, etnograftar men mýzykanttardan quralǵan Qazaqstan delegatsiiasy, jergilikti memlekettik organdar men qazaq diasporasynyń ókilderi jáne aimaq turǵyndary.
Jiynǵa qatysýshylar Dina Nurpeiisovanyń dombyra mýzykasynyń damýyna jáne ony orkestrge beiimdeýine, sondai-aq klassikalyq kúi mektebiniń qalyptasýyna qosqan erekshe úlesin atap ótti. Olardyń aitýynsha, Astrahan oblysy kórnekti kompozitordyń ekinshi otany bolyp sanalady. Sebebi, ol munda 15 jyl ómir súrgen jáne 1934 jyly Marfino aýylyndaǵy ótken kórkemónerpazdar baiqaýynda birinshi oryn aldy, bul kúishiniń alǵashqy jeńisi bolatyn.
Merekelik sharanyń jalǵasy retinde 26 qarashada Qazaqstan Respýblikasynyń Eńbek sińirgen ártisi Aigúl Úlkenbaeva Astrahan mádeniet jáne óner kolledjinde dombyrada sheberlik sabaǵyn ótkizedi.
