Elordanyń oiyn-saýyq oryndary shekteý sharalaryna qaramastan tyiym salynǵan ýaqytta qyzmet kórsetýlerin jalǵastyrǵan. Bul týraly Nur-Sultan qalalyq politsiia departamenti Jergilikti politsiia qyzmeti basqarmasynyń bastyǵy Gosman Jakin aitty, dep habarlaidy QazAqparat.
«Osy jyldyń 27 qazanynan bastap karantin rejimin saqtaý boiynsha birqatar qosymsha shekteý engizildi. Elorda politsiiasy sanitarlyq normalardy buzý faktilerin anyqtaý úshin kún saiyn reidtik sharalar júrgizip jatyr. Erjelerdi buzatyn nysandarǵa, atap aitqanda, oiyn-saýyq mekemelerine, saýda oryndaryna erekshe nazar aýdarylady. Quramynda sanitarlyq qyzmet, ákimdik qyzmetkerleri, eriktiler jáne politsiia ókilderi bar mobildi toptar kún saiyn reid júrgizip, karantin rejimin buzǵandardy anyqtap, jaýapqa tartady. Qabyldanyp jatqan sharalarǵa qaramastan keibir oiyn-saýyq mekemeleri sanitarlyq talaptardy buzyp, tyiym salynǵan ýaqytta qyzmet kórsetýin jalǵastyrýda», - dedi Gosman Jakin.
Máselen onyń dereginshe, 21 qazanda Manas kóshesindegi káýaphananyń jumys jáne demalys kúnderi bekitilgen ýaqyt rejimine qaramastan qyzmet kórsetkeni anyqtalǵan. Al 24 qazanda Beiimbet Mailin kóshesinde ornalasqan «Janym sol» karaoke-barynda tyiym salynǵan ýaqytta kelýshiler bolǵan. Sonymen qatar meiramhanalarda kóp adam shaqyryp, otbasylyq toi-tomalaq ótkizetinder de tyiylmai otyr. Atap aitqanda, Turan dańǵyly boiyndaǵy «Grand Hall Astana» meiramhanasynda bir kúnde qyz uzatý men týǵan kún keshi qatar ótkizilgen.
«Anyqtalǵan barlyq ereje buzýshylyqtardy ákimshilik jaýapkershilikke tartý maqsatynda Nur-Sultan qalalyq taýarlar men kórsetiletin qyzmetterdiń sapasyn jáne qaýipsizdigin baqylaý departamentine jinaqtalǵan materialdar jiberildi», - dedi Jergilikti politsiia qyzmeti basqarmasynyń bastyǵy.
