«Azamattarǵa arnalǵan úkimet» mekemesiniń Nur-Sultan qalasy boiynsha filialynyń direktory Mádi Sadanovtyń aitýynsha, qalanyń halyqqa qyzmet kórsetý ortalyqtarynda JSN-ge ótinish berýshi sheteldikter kóbeigen, dep habarlaidy QazAqparat.
«Halyqqa qyzmet kórsetý ortalyqtarynyń jumysyn baǵalaityn eki ólshem bar. Olar – kútý ýaqyty men rásimdeý ýaqyty. Kútý ýaqyty azamat konsýltatsiiaǵa talon alǵan sátten bastap operatordyń aldyna kelgen kezge deiin esepteledi. Al rásimdeý ýaqyty operatordyń aldyna kelgen sátten qyzmet alyp bolǵanǵa deiin esepteledi. 2021 jyly kútý ýaqytynyń talabyn buzý faktileri 3 ese qysqarǵan bolatyn. Biyl qaita kóbeidi. Al rásimdeý ýaqyty boiynsha kerisinshe tómendeý bar. Byltyr koronavirýsqa qatysty shekteýlerdiń áserinen halyqqa qyzmet kórsetý ortalyqtaryna kelýshiler sany qysqarǵan edi», - dedi ol qalalyq máslihattyń turaqty komissiia otyrysynda.
Sondai-aq, ol halyqqa qyzmet kórsetý ortalyqtarynda kútý ýaqytynyń talaby nege jii buzylatynyn aitty.
«Bizde aqparattyq júielerde jii irkilister bolady. Mysaly, Memlekettik kirister komitetiniń aqparattyq júiesinde irkilis paida bolsa, avtokólikti rásimdei almai qalamyz. Óitkeni kólik iesiniń moinyndaǵy salyqtar men aiyppuldardy kórýimiz kerek. Zańdy tulǵalardyń atyndaǵy jyljymaityn múlikti de osy júieden qaraimyz.
Qańtar oqiǵasy rásimdeý ýaqytyna qoiylatyn talaptardyń buzylýyna áser etken bolatyn. Internette shekteý boldy. Biz jumys istep turǵanymyzben adamdarǵa qyzmet kórsete almadyq.
Sondai-aq, shetel azamattarynyń úlken aǵynyn kórip otyrmyz. Onyń ishinde reseilikter kóp. Jeke sáikestendirý nómirin alýshylardyń nópiri bar», - dedi Mádi Sadanov.
