2030 jylǵa qarai elorda turǵyndarynyń sany 2 mln adamǵa jetedi. Bul týraly otandyq BAQ ókilderine suhbat bergen Elbasy Nursultan Nazarbaev aitty, dep habarlaidy "Ult aqparat".
Kezdesý barysynda «Egemen Qazaqstan» gazetiniń basqarma tóraǵasy Darhan Qydyráli Elbasydan: «Ózińiz atap ótkendei, biylǵy jyldyń eń basty aishyqty oqiǵasy Astanamyzdyń 20 jyldyǵyn jurt bolyp jumylyp, atap óttik. Elimizdiń elordasynyń alar asýy áli alda dep esepteimiz. El eńsesin tiktegen elordamyzdyń damý barysynda, sizdiń pikirińizshe, qandai erekshelikterdi airyqsha atap óter edińiz?», - dep surady.
«Munyń eń tereń astaryn túsinetin ýaqyt keldi. Eń basynda biz muny aita almadyq, jaǵdai ártúrli boldy. Eldiń ishinde jurtymyzdyń ózi biryńǵai emes edi. Sol kezdegi depýtattardyń arasynda bizdiń ulttyń sany azdaý boldy. Bir jaǵynan sonyń bárin eskerip, ekinshi jaǵynan qiyn-qystaý jaǵdaida elge jańa jol silteý úshin osyndai jańalyq kerek boldy. Árine, men bastaǵan kez óte qiyn edi», - dep eske aldy Memleket basshysy.
Elbasy elordamyzdy kóshirer aldynda ózge memleketterdiń astanany aýystyrý tarihyna jiti nazar aýdarǵanyn basa aitty.
«Qazaqstannyń dál kindik ortasy - Jezqazǵan. Jezqazǵandy ózderińiz de bilesizder, basynda ol jerge de, Ulytaýǵa da bardym. Esh nárse joq. Jol da, temir jol da, energetika da, eshteńe de joq. Qaraǵandyny da qaradym. 20 jyldai Temirtaýda jumys istedim, jaqsy bilemin. Kómirdiń ortasyna, ekologiiasy qiyn jerge aparý qisynsyz. Sýy da joq. Kókshetaýǵa barsaq, shetke shyǵyp ketemiz. Aqtóbege barsaq batysqa ketip qalamyz. Sondyqtan oilana kele 4 joldyń toraby retinde Aqmolany tańdadyq. Degenmen, bolary boldy, Astana quryldy. Qazir dalada 20 gradýs aiaz bolyp tur ǵoi. Onyń eshqandai jamanshylyǵy joq. Bir jerde ystyq, bir jerde sýyq. Ózimizdiń elimiz, jerimiz. Qazaqstannyń tóri, Saryarqanyń ortasy, Ata-babamyzdyń tabany tigen, qonystanyp, malyn óristetken jeri», - dedi QR Prezidenti.
Nursultan Nazarbaev el astanasyn Saryarqa tórine aýystyrýdyń paidasy orasan bolǵandyǵyn basa aitty.
«Halyq kóp qonystanǵan ońtústikten soltústikke qarai kóshi-qon kúsheidi. Bul jaqta jer de, jumys ta bar. Al ol jaqta jer de, jumys ta joq. Qazir de kóship jatyr. Qazir Túrkistan oblys ortalyǵy bolǵannan keiin Astananyń turǵyndary «Endi shymkenttikter Túrkistanǵa baratyn boldy ǵoi» dep qaljyńdaityn kórinedi», - dedi Elbasy.
QR Prezidentiniń dereginshe, búginde Astana turǵyndarynyń sany 1,2 milliondy quraidy. Al 2030 jylǵa qarai 2 mln adamǵa jetýi yqtimal.
«Jalpy men Vashington siiaqty 5-8 qabatty úileri bar, tek sheneýnikter ǵana turatyn qala bolsa dep oilap edim. Myna keń dalada biigirek úi bolmasa, eshteńe kórinbei qalady. Sondyqtan, sáýletshiler boi bermei, kótereiik dep saldy. Qazir 230 metrlik «Ábý Dabi» salynyp jatyr. Ol postkeńestik keńistiktegi eń biik ǵimarat bolmaq», - dedi Memleket basshysy.
