Astana qalasynyń ákimi Baqyt Sultanov ákimdiktiń progressivti bastamalaryn jalǵastyrýǵa múddeli, dep xabarlaidy "Ult aqparat".
"Men buryn da tańerteń jumysqa jaiaý baratyn edim. Qazir de úiim jaqyn. Endi, sál ainalyp barý qajet. Degenmen, onyń da jańa jumysyma kómegi bar. Sebebi kóshemen kele jatqanda biraz kemshilikterdi kórip, tiisti tapsyrmalardy berýge múmkindik bar. Al kúndiz osy Úkimetke jáne basqa da otyrystarǵa kelgende taksige minemin. Óitkeni ákimdiktiń burynǵy progressivti ideialaryn toqtatýǵa bolmaidy. Sonyń bárin jalǵastyrý qajet. Meniń mindetterimniń biri - ol jańa innovatsiialyq ári kreativti ideialardy toqtatpaý, naqty nátijege jetý", - dedi B.Sultanov Úkimettiń búgingi otyrysynan keiin.
Qala ákimi qazirgi jumysyn burynǵy ministr qyzmetimen de salystyrdy. Onyń aitýynsha, ministrlikte, kóbinese, saiasat pen zań shyǵarý sharalary basym boldy. Al qala bólek bir "qojalyq" ispetti. "Endi, Astanany bólek bir "qojalyq" dep esepteýge bolady ǵoi. Onyń ártúrli problemalary bar. Eń aldymen, qala turǵyndarynan keletin talaptarǵa nazar aýdarý qajet. Sonyń bárin jerge tastamai, der kezinde oryndaý qajet. Sondyqtan bul qyzmet - men úshin praktikalyq jumys. Ár adamnyń mansabyna qajet dep oilaimyn. Meniń áleýmettik jelilerde akkaýnttarym bar. Sonyń bárin jii-jii qarap turamyn. Biraq jumys kóp bolǵannan keiin tikelei ózim jaýap bere almaityn shyǵarmyn. Degenmen, ashyq bolýǵa, keri bailanys ornatýǵa tyrysamyz. Ákim jumysynyń basty artyqshylyǵy - taza aýada jii júresiń. Sebebi barlyq nysandardy aralap, jumysty óz kózińmen kórýiń kerek", - dep atap kórsetti B.Sultanov.
Aita keteiik, jýrnalisterge suxbat bergen qala ákimi eń aldymen qai máselelge mán beretinin de aityp berdi. "Árine, bul jumys óte qyzyqty. Bir jaǵynan joǵary talaptar qoiylyp otyr. Sebebi Astana ósip keledi, xalyqtyń sany da kóbeiip jatyr. Sondyqtan qyzmet kórsetý sapasyn da arttyrý qajet. Ótken jetide Elbasy aktivpen bolǵan kezdesý kezinde biraz máselelerdi kóterip, naqty tapsyrmalar berdi. Sonyń ishinde elordany damytýdyń jańa modelin ázirleý mindeti bar. Osyǵan bailanysty ákimdik qysqa ýaqyttyń ishinde Astanany damytýdyń 2050 jylǵa deiingi strategiiasyn usynýy qajet. Biz osy jumysty bastap ketti", - deidi B.Sultanov.
