Erteńnen bastap elorda kinoteatrlary sanitarlyq talaptardy saqtai otyryp óz jumysyn bastaidy.
Osy oraida sanitarlyq-epidemiologiialyq basqarma ókilderi elorda turǵyndary kinoteatrlarda qandai talaptardy saqtaýy tiis ekendigi týraly aityp berdi, dep habarlaidy QazAqparat.
«Búgingi monitoringtik sharanyń maqsaty – elordadaǵy kinoteatrlardyń jumys isteý tártibi men sanitarlyq talaptardy saqtaýyn túsindirý jáne qadaǵalaý. Ózderińiz biletindei keshe ǵana qalalyq bas dárigerdiń kinoteatrlardyń jumys isteýine ruqsat berý týraly qaýlysy shyqty. Barlyq kinoteatrlar sanitarlyq talaptardy birdei jáne qatań túrde saqtaýy tiis. Onyń ishinde maska taǵyp júrý, antiseptiktiń bolýy mindetti jáne adamdar arasyndaǵy araqashyqtyqty saqtaý. Kinoteatrlardyń tańerteńgi saǵat 10:00-den, túngi saǵat 00:00-de deiin jumys isteýine ruqsat berildi», - dedi Nur-Sultan qalasy Esil aýdandyq sanitarlyq-epidemiologiialyq basqarmasynyń basshysy Arman Qurbanov.
Onyń aitýynsha, elordadaǵy kinoteatrlardyń jumys isteý barysyn arnaiy monitoringtik top qadaǵalaityn bolady.
«Kórermender ózimen birge tamaq alyp kelýge bolmaidy, tek qana sýǵa ruqsat beriledi. Taǵy bir aityp ótetin dúnie, 5 jasqa deiingi balalardyń kinoteatrlarda maskasyz júrýine ruqsat bar, al odan joǵary balalar men eresekter mindetti túrde maska taǵyp júrýi kerek. Sondai-aq, 5 jasqa deiingi balalardy ata-analar ózderiniń qasyna alyp otyrýǵa bolady. Bizde arnaiy monitoringtik top quryldy, top músheleri qala boiynsha kinoteatrlardyń sanitarlyq talaptardy saqtaýyn qadaǵalaidy. Kinoteatrlarǵa reid kúndiz jáne túnde júrgiziletin bolady. Eger tiisti talaptardyń buzylǵany anyqtalǵan jaǵdaida, akt toltyrylyp kinoteatr ókilderi jaýapqa tartylatyn bolady», - dedi ol.
Aita ketsek, búgin elordada arnaiy monitoringtik top ókilderi kinoteatrlarynyń jumys isteýge daiyndyq barysyn tekserip shyqty.
Eske sala ketsek, elordada 26 jeltoqsannan bastap qalanyń bas sanitarlyq dárigeri Janna Pirálievanyń qaýlysymen kinoteatrlardyń sanitarlyq-epidemiologiialyq normalarǵa sai jumys isteýine ruqsat berildi.
