Elorda ákimi Altai Kólginov jarylystan zardap shekken Arys qalasyna qandai kómek kórsetip jatqandaryn aitty, dep habarlaidy "Ult aqparat".
«Memleket basshysynyń tapsyrmasymen Arys qalasynyń turǵyndaryna kómek kórsetý jáne qalany qalpyna keltirý boiynsha birqatar jumys júrgizilip jatyr. Qala ákiminiń orynbasary Nurlan Nurkenov qurylys brigadalarymen birge Arys qalasyna barady. Túrkistandyq áriptestermen birge turǵyn úiler men basqa da infraqurylym obektilerin qalpyna keltirý jumystaryn bastaidy. Ol jerde bizdiń shatyr-lagerlerimiz bolady», - dep jazdy elorda ákimi áleýmettik jelidegi paraqshasynda.
Sonymen birge, ákim Arys qalasynyń zardap shekken turǵyndaryna bir kúndik jalaqysyn aýdaryp, qoldaý kórsetken qyzmetkerge jáne qala turǵyndaryna alǵys bildirdi. Búginge deiin memlekettik organdardyń, qalalyq mekemeler men kásiporyndardyń qyzmetkerleri Arys turǵyndaryna jalpy somasy 200 mln teńge aýdardy. Azamattar tarapynan arystyqtarǵa kómek retinde «Nurly-Astana» qoryna áli de qarjy aýdarý jalǵasýda.
Arys qalasynyń 500-ge jýyq balasynyń jazǵy demalysyn astanada ótkizýdi qolǵa aldyq. Olarǵa qalamyzdyń kórikti jerleri boiynsha ekskýrsiialar, merekelik kontsertter uiymdastyrylady. Bul sharalar 1 shilededen bastalady. Eýraziialyq ulttyq ýniversiteti balalardy jatyn orynmen qamtamasyz etip, jataqhanalaryn usynyp otyr. Sonymen birge, balalarǵa qajetti zattar, kiim, mektep qural-jabdyqtary syilanady.
«Halyqtyń birligi osyndai qiyn sátterde tanylady. Elimizdiń árbir azamaty Arys qalasynyń turǵyndaryna alańdaýshylyq bildirip otyr. Astanalyqtar da zardap shekkenderge kómek kórsetýden shet qalmaidy», - deidi Altai Kólginov.
