Nur-Sultan turǵyny Arman "Garant 24"-ke qoiǵan kóligin qalai qaitaryp alǵanyn aityp berdi. Ol kóligin habarlamalar saitynan kórip qalǵan, - dep habarlaidy Tengrinews.kz.
1 aqpanda elorda turǵyny "Garant-24"-ke quny 3,5 million teńge bolatyn kóligin qoiǵan. Lombard týraly ol áleýmettik jelilerden bilgen.
"Qazaqstandyq juldyzdar áleýmettik jelilerde "Garant-24" lombardyn jarnamalai bastaǵan soń kóligimdi sonda qoidym. Zardap shekkenderdiń 80 paiyzy osy jarnamadan estigen bolar dep oilaimyn", - deidi Arman.
Lombard erejesi boiynsha, kóligin qoiǵan Arman 600 myń teńge alýy tiis bolǵan.
"Kóligimniń naryqtaǵy baǵasy 3 million 400 myń teńge. Lombard ony 4 million teńgege baǵalady. Tólemniń mólsheri - 600 myń teńge, olar ony úsh aida beremiz dedi. Alaida ýáde bergen aqshany men almadym. Kelisimshartta lombardtyń kólikti satýǵa quqyǵy bar ekeni kórsetildi. Men táýekelge bardym, barlyǵyn notariýspen rásimdedik. Biraq, shyndap kelgende, kelisimsharttyń zańsyz ekeni anyqtaldy", - dedi Arman.
Sodan aqpannyń ortasynda Arman habarlamalar saitynda óziniń kóligin kórip qalady. Onyń baǵasy 3,5 million teńge dep kórsetilgen. Osydan keiin ol satýshylarǵa habarlasyp, kólikti kórýge kelisip, politseilerdi shaqyrǵan.
"Politseilerge jaǵdaidy túsindirdim, dálelder bolýy úshin barlyǵyn videoǵa túsirdim. Qajet qujattardy, tehnikalyq pasportty kórsettim. Satýshylar kólikti basqa bireýden (lombardtan emes) arzanǵa alǵanyn aityp túsindirdi. Meniń túsingenim, olardyń bul alaiaqtyqqa qatysy joq. Bul - meniń boljamym", - deidi Arman.
Birneshe kúnnen keiin Arman kóligin alyp ketti.
