Astana qalasy Saryarqa aýdanynyń ákimi Arman Turlybek búgin áleýmettik jelilerde taraǵan videoǵa qatysty pikir bildirdi.
"Qurmetti qala turǵyndary, osyndai qolaisyz aýa-raýy kezinde sabarlyq tanytyp, bir-birimizge qol ushyn sozaiyq. Eger kóshede adamdar qatty jeldiń kesirinen júre almai jatsa, kólikter ot almai qalyp jatsa, bir-birińizge kómektesip, meiirimdilik tanytaiyq!", - deidi ol.
Aýdan ákimi sondai-aq, jelide taraǵan videolardyń birine kóńili tolmaǵany jetkizdi.
"Jelide taraǵan kezekti bir videoǵa kóńilim tolmaǵanyn aitqym keledi. Bir jigit kólikte otyryp video túsiredi, tipti dalaǵa shyǵyp kómektesý týraly oi qaperinde de joq. Jáne ol videony ánmen árleýdi de umytpapty", - dep ashynady Arman myrza intagramdaǵy paraqshasynda.
Aita ketsek, búgin tabiǵi jaǵdaidyń kúrt ózgerýine bailanysty Astana qalasynyń ákimi Áset Isekeshevtiń sheshimimen tabiǵi sipattaǵy tótenshe jaǵdai jariialandy.
