Parlament Májilisindegi «Aq jol» fraktsiiasynyń depýtattary «Astanaenergoservis» AQ-nyń negizsiz tólemderin óndirip alýdy usyndy, dep habarlaidy QazAqparat.
Depýtat 2019 jyldyń 19 maýsymynda «Aq jol» fraktsiiasynyń «Astanaenergoservis» AQ zańsyz qyzmeti týraly depýtattyq saýal joldaǵanyn eske saldy.
«Bul saýalda «Astanaenergoservistiń» tutynýshylarǵa negizsiz salmaq salyp kelgenin aitqan edik. Olar eshteńe óndirmesten, elordanyń energetikalyq kásiporyndaryn basqarýmen ainalysty. Bul kompaniianyń eńbekaqy tóleý qory 600 mln teńgeni quraǵan, syiaqy men bonýstardy qospaǵanda keibir basshylardyń jalaqysy 1,5 mln teńgege deiin tólengen. Odan bólek keńse, qyzmettik avtokólikter bar. Bul «banket» myńdaǵan turǵyndardyń esebinen kórinbeitin tarifter arqyly jalǵasyp kelgen», - dedi M. Qazbekova QR Ulttyq ekonomika ministrine joldanǵan saýalynda.
Depýtat Nur-Sultan qalasy ákiminiń kompaniianyń jabý týraly sheshimin jáne odan 1 mlrd teńge qarjy únemdeletinin eske saldy.
«Demek, «Astanaenergoservis» 20 jyl boiy halyqtan negizsiz tólem alyp kelgen. Sondyqtan, «Aq jol» fraktsiiasynyń depýtattary barlyq óńirlerge taldaý jasap, halyqtyń «moinynda otyrǵan» kompaniialardy anyqtaýy tiis. Ondai uiymdardy jaýyp, tutynýshylarǵa kommýnaldyq tólemderiniń bir bóligi qaitarylýy tiis», - dedi ol.
Aita keteiik, «Astana» áleýmettik-kásipkerlik korporatsiiasynyń 10 kásiporyny jabylady. Nur-Sultan ákimi Altai Kólginovtyń aitýynsha, «Astanaenergoservis» AQ jabýdan jylyna 1 mlrd teńge únemdeledi. Únemdelgen qarajat qystyq tehnika alýǵa jumsalady.
