Májilis depýtaty Zaýresh Amanjolova barlyq depýtat atynan Astanadaǵy joiqyn órtten kóz jumǵan balalardyń ata-anasyna kóńil aitty, dep habarlaidy Sputnik Qazaqstan tilshisi.
"Eń aldymen, barlyq májilis depýtatynyń, fraktsiianyń jáne Qazaqstan halqy Assambleiasy depýtattyq tobynyń atynan Astanada joiqyn órtten qaza bolǵan balalardyń ata-anasyna kóńil aitamyz", - dedi Amanjolova depýtattyq saýalyna kirispes buryn.
Depýtat elordadaǵy qaiǵyly oqiǵadan keiin prezidenttiń tapsyrmasymen úkimettiń jumys toby qurylǵanyn eske salyp, turmysy tómen azamattardy qoldaýǵa jyl saiyn 365 milliard teńge bólinetinin atap ótti.
"Jańadan qurylǵan jumys tobyna ár óńir boiynsha memlekettiń qoldaýyna muqtaj azamattar sanaty anyq kórsetilgen arnaiy áleýmettik karta jasaý qajet dep oilaimyz", - dedi ol.
Sondai-aq, ol parlament depýtattary atalǵan jumys tobyna belsendi qatysýǵa jáne naqty usynystar engizýge daiyn ekenin aitty.
"Bizdiń birlesken jumys halyqty mazalap júrgen áleýmettik máselelerdi sheshý boiynsha memlekettik sharalardy jetildirýge múmkindik beredi degen oidamyz", - dep túiindedi Amanjolova.
Eske sala ketsek, aqpannyń úshinen tórtine qaraǵan túni Astanadaǵy Kóktal-1 turǵyn úi alabynda "vremianka" órtenip, bes bala kóz jumdy. Qaza bolǵandardyń barlyǵy – qyz bala. Balalardyń ata-anasy túngi ýaqytta jumysta bolǵan.
