QR Prezidenti Nursultan Nazarbaev barlyq memlekettik organdardyń basshylaryn bes áleýmettik bastamany oryndaýǵa airyqsha mán berýge shaqyrdy, dep habarlaidy QazAqparat.
Bul rette stýdentter úshin 75 myń orynǵa arnalǵan jataqhana nysandaryn salý baǵytyna erekshe ekpin qoiyldy. Memleket basshysy elordaǵa bilim alýǵa kelgen stýdentter tap bolatyn jaǵdaiǵa toqtaldy.
"Nege mende osyndai ideia paida boldy? Qalany aralaý kezinde Astana stýdentteri bazardaǵy lashyqtarda turyp jatqanyn kórdim, iaǵni tek túnep shyǵý úshin osyndai jerlerge barady. Ondai jerlerde sabaq oqýǵa nemese jýynýǵa eshbir jaǵdai jasalmaǵan. Sáikesinshe, ol qandai bilim alady? Mundai jaǵdai osynda ǵana emes, sonymen qatar ózge jerlerde bolýy múmkin. Atap aitqanda, elordada ata-anasymen birge turatyn stýdentter bar, sonymen qatar ózge óńirlerden bilim alý úshin qalaǵa keletinder de az emes. Sondyqtan da bilim alý úshin qolaily jaǵdailarǵa qol jetkizý - bizdiń jastar úshin úlken igilik", - dedi Nursultan Nazarbaev «Nur Otan» Saiasi keńesiniń keńeitilgen otyrysynda.
Sonymen qatar Prezident jazǵy kezde stýdentterdiń ózderin qurylysqa tartý kerektigin usyndy.
QR Premer-Ministriniń orynbasary Erbolat Dosaevtyń sózine qaraǵanda, jataqhanalarda 2019 jyly 5 myń oryn, 2020 jyly 15 myń jańa oryn paidalanýǵa beriledi.
