Foto: Gov.kz
Astananyń ortalyq saiabaǵyndaǵy "Atyraý" kópiriniń janynda «Zań jáne tártip» atty erekshe fotokórme ashyldy, dep habarlaidy Elorda ákimdigi.
Kórmede quqyq qorǵaý organdary qyzmetkerleriniń kúndelikti eńbegine arnalǵan ondaǵan fotosýret qoiylǵan.
Ekspozitsiiany QR Ishki ister ministrligi uiymdastyryp otyr. Onyń maqsaty – azamattardyń quqyqtyq sanasyn nyǵaitý, quqyq buzýshylyqqa tózbeýshilikti qalyptastyrý jáne qoǵamda «Zań jáne tártip» qaǵidatyn nasihattaý. Kórmeniń saltanatty ashylýyna erekshe reńk bergen – QR IIM Ulttyq ulanynyń úrmeli orkestri oryndaǵan mýzykalyq kompozitsiialar.
Kórmege qoiylǵan fotosýretterdiń basym bóligi – IIM sáýir aiynda jariialaǵan fotobaiqaý nátijesinde jinalǵan jumys. Baiqaýǵa elimizdiń ár óńirinen shamamen 100 fotosýret kelip tústi. Ár sýret – ýchaskelik inspektorlardyń, patrýldik politsiia qyzmetkerleriniń, qutqarýshylar men qyzmettik itterdiń ómirinen alynǵan shynaiy oqiǵalar. Olar kún saiyn zańdylyq pen qaýipsizdik kúzetinde tur.
Fotosýretterde quqyq qorǵaý salasy qyzmetkerleriniń jumys barysy beinelengen: tasqyn saldaryn joiý, orman órtin sóndirý, mektep oqýshylarynyń qaýipsizdigin qadaǵalaý, qoǵamdyq tártipti saqtaý jáne jol qaýipsizdigin qamtamasyz etý. Ásirese balalardy qorǵaý men aldyn alý sharalaryna erekshe mán berilgen, iaǵni aýlalardaǵy qaýipsizdik pen bilim ordalaryndaǵy is-sharalar kórinis tapqan.
Politsiianyń jumysy – tek qylmyskerlerdi ustaý emes. Olar – tótenshe jaǵdaidaǵy kómek, tynyshtyqty kúzetý, adamdardyń ómirin saqtaý. Biz osynyń bárin kamera obektivi arqyly kórsetkimiz keldi. Kórmege azamattardyń qyzyǵýshylyǵy kútkenimizden de asyp tústi. Biz munda eki saǵattan astam ýaqyt boldyq, osy aralyqta adamdar legi bir sátke de toqtaǵan joq. Bul taqyryptyń jurtqa jaqyn ekeni baiqalady. Adamdar toqtap, suraqtaryn qoiyp, emotsiialaryn bólisip jatyr, — dedi QR IIM Aqparattyq saiasat departamenti basshysynyń orynbasary Dinara Saǵandyqova.
Fotokórme kún sońyna deiin jalǵasady jáne niet bildirýshiler emin-erkin kóre alady.
