Qurban ait merekesi kúni Astana qalasyndaǵy «Qazan at» atshabaryndaǵy etno aýylda Ońtústik Qazaqstan oblysynyń kúnderi aiasynda xalyqqa dastarhan jaiylyp, 300 keli palaý taratyldy. Aittyq dastarxannan bes myńǵa jýyq adam dám tatty. Sharanyń maqsaty - asyl dinimizdiń qundylyǵyn arttyryp, qazaq halqynyń darhandyǵy men mádenietin pash etý.
Sharada sóz alǵan Ońtústik Qazaqstan oblysy ákiminiń orynbasary Ulasbek Sádibekov barsha astanalyktardy Qurban ait meiramymen quttyktady.
«Ózderińizge málim, 2017 jylǵy 29 tamyz – 3 qyrkúiek aralyǵynda «EKSPO-2017» halyqaralyq mamandandyrylǵan kórmesi aiasynda Astana qalasynda Ońtústik Qazaqstan oblysynyń kúnderi ótýde. Qurban ait - Allany eske alýǵa sebepker bolatyn jáne adamdardyń bir-birine qaiyrym jasaýyna uiytqy bolatyn erekshe dini rásim. Qasietti Qurban ait merekesinde yntymaq pen birligimizdi, ózara tatýlyǵymyzdy arttyrý maqsatynda, oblys basshysy atynan Astanalyqtarǵa jáne Elorda qonaqtaryna arnaiy dastarhan jaiyp as taratylyp otyr», - dedi Ulasbek Sádibekuly.
Shara barysynda Qurban ait merekesine orai bir iri qara men eki qoi qurbandyqqa shalynyp, 1 tonna baýyrsaq pisirildi. Qala turǵyndary men qonaqtaryna Tólebi aýdanynyń qymyzy men Otyrar aýdanynyń shubaty usynyldy. Sondai-aq kelýshilerge ońtústiktiń táttiligi til úiirer jemis –jidekteri men qaýyn-qarbyzy tegin úlestirildi.
Oblystyń mádeni, tarihi kelbetin aiqyndaityn 2000-ǵa jýyq qundy jádigerler men qylqalam jáne qolóner sheberleriniń týyndylary da Astana halqy men EKSPO qonaqtary nazaryna usynyldy. Sonyń ishinde qazaq tarihynda orny aiyryqsha Kenesary Qasymulynyń qylyshy da bar.
Etno aýyldaǵy ulyq merekeniń kórkin Ońtústik Qazaqstan oblystyq filarmoniiasynyń ánshileri qyzdyra tústi. Kúmis kómei, jez tańdai ánshiler kiiz úilerdi aralai júrip, qazaqtyń dástúrli ánderin naqyshyna keltirip oryndap, kópshilik yqylasyna bólendi.
OQO ákiminiń baspasóz qyzmeti
