Islam yntymaqtastyq uiymynyń Astanadaǵy sammitinde Túrkiia delegatsiiasy Mianmadaǵy musylmandar problemasyn kóterýdi kózdeidi. Túrik delegatsiiasyn osy eldiń basshysy Redjep Taiyp Erdoǵan bastap keldi, dep xabarlaidy QazAqparat tilshisi.
"Biz Túrkiianyń Syrtqy ister ministrimen kezdesip, biraz máselelerdi talqylap shyqtyq. Sonyń ishinde Mianmadaǵy musylmandardyń jaǵdaiyna qatysty problemalar da bar", - dedi QR Syrtqy ister ministri Qairat Ábdiraxmanov jýrnalisterge bergen suxbatynda.
Onyń aitýynsha, Túrkiianyń syrtqy ister ministri Mianmadan qashyp ketken bosqyndarǵa ózi baryp, olardyń jaǵdaiymen jan-jaqty tanysyp shyqqan.
"Ol óz áserimen bólisti. Túrkiia eliniń ókilderi Astanadaǵy Islam yntymaqtastyq uiymynyń sammiti kezinde Mianmadaǵy musylmandar máselesin kóterýdi kózdeidi", - dep atap kórsetti Ábdiraxmanov.
Aita keteiik, búgin Aqordada QR Prezidenti Nursultan Nazarbaev Túrkiia Respýblikasynyń basshysy Redjep Taiyp Erdoǵandy qabyldady. Ekijaqty kezdesý kezinde Erdoǵan qazaq jerine jasaǵan alǵashqy saparyn eske aldy.
