Astana turǵyny "kólikpen jaiaý júrginshiler kópirinen óte alamyn" dep dosymen bástesken. Saldarynan kólik júrgizýshisi tártip buzǵany úshin 15 táýlikke qamaýǵa alynǵan.
Sottyń deregine sensek, qoǵamdyq oryn sanalatyn ortalyq saiabaqtyń "Atyraý" jaiaý júrginshiler kópirinde er adam kólikti memlekettik nómirsiz júrgizgen.
Sot otyrysynda quqyqbuzýshy kinásin tolyq moiyndap, avtokólikti jaiaý júrginshiler kópirinde júrgizý týraly dosymen básteskenin, jasaǵan isine ókinetinin aitty.
"Jasalǵan árekettiń sipatyn, kináliniń jeke basyn, onyń quqyqbuzýshylyq jasaǵanǵa deiingi jáne odan keiingi minez-qulqyn, istiń mán-jaiyn eskere otyryp, kópirdegi jaiaý júrginshilerdiń ómiri men densaýlyǵyna qaýip tóndirgen adamdy tárbieleý maqsatynda, sondai-aq jańa quqyqbuzýshylyq jasaýǵa jol bermeý maqsatynda, sottyń qaýlysymen er adam usaq buzaqylyq jasaǵany úshin kináli dep tanylyp, oǵan 15 táýlikke ákimshilik qamaqqa alý túrindegi ákimshilik jaza taǵaiyndaldy", – delingen habarlamada.
