Úkimettiń búgingi otyrysynda QR Premer-Ministri Baqytjan Saǵyntaev QR Densaýlyq saqtaý ministri men Astana qalasynyń ákiminen elorda perzenthanasyndaǵy ana óliminiń sebebin surady, dep habarlaidy QazAqparat tilshisi.
Densaýlyq saqtaý ministri Eljan Birtanovtyń aitýynsha, barlyq qajetti tekserý jumystary júrip jatyr.
«Barlyǵy shilde aiynda bolǵandyqtan, patologiialyq, anatomiialyq, morfologiialyq zertteýler júrgizilip jatyr, zertteý jumystary bitken soń tolyq aqparat beremiz. Jalpy qazir Astana qalasyndaǵy ambýlatoriialyq deńgeide áielderge qandai qyzmet kórsetilgenin tekserip jatyrmyz. Arnaiy shtab qurylǵan. Astana qalasynyń ákimdigimen birge jumys istep jatyrmyz. Munda úlken máseleler bar dep aitýǵa bolmaidy, kei jaǵdaida barlyǵy áielderdiń óz densaýlyǵyna bailanysty bolady. Perinataldyq ortalyqqa tekserý jumystaryn júrgizdik. Sanitariialyq, epidemiialyq rejimde bári durys. Ári qarai jumys isteimiz jáne qosymsha aqparat beremiz», - dedi Eljan Birtanov Úkimet otyrysynda.
Sondai-aq, Astana qalasynyń ákimi Áset Isekeshev te qaiǵyly oqiǵa boiynsha Premer-Ministr aldynda jaýap berdi.
«Barlyq jaǵdailar boiynsha jetekshi meditsinalyq ortalyq mamandarynyń qatysýymen konsiliým ótkizildi jáne barlyǵy Densaýlyq saqtaý ministrligimen talqylanyp, naqty is-áreket jospary túzildi. Sondai-aq, táýelsiz saraptama júrgizý úshin jáne akýsherlik-ginekologiialyq kómek úshin Eýropanyń myqty dep sanalatyn mamandaryn shaqyryp otyrmyz. Másele baqylaýda», - dedi Áset Isekeshev.
Aita keteiik, keshe Astananyń №2 perinataldy ortalyǵynda bosanǵan kelinshek kóz jumdy. Dárigerler shaqalaqty aman alyp qaldy.
Oǵan deiin elordadaǵy №1 perinataldyq ortalyqta úsh áiel kóz jumǵan edi.
