Astanadaǵy Abý Dabidiń qurylysyna qatysty taǵy daý shyqty. Bul joly Elordadaǵy eń biik ǵimaratty salyp jatqan 400-ge jýyq adam bir kúnde jumyssyz qaldy. Qurylys kompaniialary aldyn ala eskertý jasamaǵan. Jáne ótemaqy tólemeitinderin ashyq aitqan kórinedi. Alaida, jumysshylar «ket» degenge, kete salaiyn dep otyrǵan joq. Bir-bir úidi asyrap júrgen azamattar Eńbek kodeksi boiynsha óz quqyqtaryn talap etýge kiristi. Bul týraly KTK arnasy habarlady.
"Men senbi túngi smenge túskem, jeksenbi tańda shyǵamyn. Beidjik istemei qaldy. Eshqandai eskertý bolǵan joq. Mal siiaqty keldi de, jumystan shyǵaryp tastap jatyr. Biz sonda qaida baramyz, mysaly qaqaǵan sýyq kúnde? Meniń bala-shaǵam bar, kreditim bar. Eki myń shaqyrymnan kelip otyrmyn", – deidi Maqsat Ahmet esimdi jumysshy.
Iaǵni, jumysshylarǵa qurylys kompaniialary esh eskertý jasamaǵan. Basshylary óz erikterińmen orydaryńdy bosatyńdar dep qysqa qaiyrypty. Kónbegendi, Eńbek kodeksimen qýdalaimyz dep qorqytatyn kórinedi.
Taǵy bir Muhtar Qaldybek atty jumysshy "Kompaniia bankrot bolǵan jaǵdaida 1 ailyq tóleidi, eger kompaniia jumysty toqtatyp, obekt bitken jaǵdaida deidi ol kezde 2 ailyq tólenedi deidi. Aldynda úsh ai bolǵan, 2015-te kodekste ózgeris bolǵan, sol úshin eki aiǵa ózgertip qoiǵan" – deidi.
Bul azamattardy otandyq tórt qurylys kompaniiasy jumysqa alǵan. Demek, Eńbek týraly kodekstiń talaptaryn buzyp otyrǵan da jergilikti mekemeler. Onda jumysshylardyń janaiqaiyna qulap asatyn eshkim bolmaǵan soń, qurylysshylar «Nur Otannan» arasha túsýdi surap kelgen edi, bilik partiiasyndaǵylardyń jaýaby mynadai boldy:
Vladislav Sergeev, «Nur Otan» partiiasy Astana qalasy boiynsha filialy tóraǵasynyń orynbasary:
"Biz qurylys kompaniialarynyń ókilderin shaqyryp, ákimdiktegi áriptesterimizben birge sóilesemiz. Eger sizder aitqandai, shynynda da qanshama adamdy jumystan negizsiz shyǵarsa, máseleni shesheýge kómektesemiz", – dedi «Nur Otan» partiiasy Astana qalasy boiynsha filialy tóraǵasynyń orynbasary Vladislav Sergeev.
Astanadaǵy Abý Dabidi jergilikti jumysshylarmen qatar sheteldik qurylysshylar da salyp jatyr. Biraq, jappai jumystan qýý týraly tosyn buiryq tek el azamattaryna qatysty. Syrttan kelgenderdiń mazasyn alyp jatqan deidi narazylyqqa shyqqandar. Dalada qalǵan jumysshylar bolsa, qurylys kompaniialary tiisti ótemaqyny tólegenshe tynym tappaimyz dep otyr.
