Astanada UQK qyzmetkeri joǵalyp ketti, - dep habarlaidy kaz.tengrinews.kz tilshisi.
32 jastaǵy Samat Shákeevtiń týystary biylǵy 21 tamyzda er adamnyń jumystan oralmaǵanyn aitty. Áli kúnge deiin onyń qaida ekeni belgisiz. Jubaiy Saltanat Shákeeva kúieýiniń Ulttyq qaýipsizdik komitetiniń qyzmetkeri ekenin jáne Astanada jumys istegenin habarlady.
"Ol osymen segizinshi jyl QR UQK-da jumys istep keledi, sheni - kapitan. 21 tamyzda kezekshilikten shyqqan. Tańǵy jetide jumystan shyǵyp ketipti. Úige tańǵy 10-da kelýi kerek edi. Kelmegen soń telefonyna habarlasa bastadym, biraq sóndirýli boldy. Keiin taǵy habarlastym. Túste áriptesine habarlasyp edim, jumystan ketkennen keiin ony eshkimniń kórmegenin aitty. Sol kúnnen beri joq", - dedi Samat Shákeevtiń áieli.
Áieliniń aitýynsha, qala boiynsha er adamnyń joǵalǵany týraly habarlandyrý ilingen, alaida ázirshe eshqandai da málimet túspegen.
"Eskertpei keshigetin ýaqyty bolmaǵan. Ishpeidi, shekpeidi. Qumar oiyndaryna barmaidy, qaryzy joq. Sondyqtan birden dabyl qaqtym. 20 tamyzda kezekshilikke kiriskeninde túngi ekide qalalyq telefon arqyly sóileskenbiz, ol jumysynan telefon soqqan. Sodan beri qaida ekenin bilmeimin. (...) Eshqaida eskertýsiz ketpeitin", - dedi Shákeeva.
Er adamnyń týystary dereý politsiiaǵa habar bergen. "Kúieýimniń Kenesary-Shevchenko kósheleriniń qiylysyndaǵy "Redison" qonaqúiiniń mańynda júrgeni beinelengen video ǵana bar, beinebaqylaý kamerasyna túsirilipti. Basqa málimet joq", - dedi Saltanat Shákeeva.
