Shildeniń basynan beri Nur-Sultan qalasynda PTR test anyqtamasyn jasap satýdyń eki faktisi tirkelgen, dep habarlaidy "Ult aqparat".
Ishki ister ministrliginiń baspasóz ókili Shuǵyla Turlybek vedmostvonyń aqparat alańynda osyndai málimet berdi.
«Nur-Sultanda PTR testileýden ótkeni týraly jalǵan anyqtama satyp júrgen tulǵalar anyqtaldy. Shildeniń basynan beri qoldan jasalǵan anyqtama satýdyń 2 jaǵdaiy tirkeldi. Astana saqshylary meditsinalyq ortalyq direktoryn ustady. Ol aýrý juqtyrmaǵany týraly jalǵan PTR testileý anyqtamasyn berýmen ainalysty degen kúdikke ilinip otyr. Ortalyq basshysynyń zańsyz anyqtama úshin klientterden 6 myń teńgeden alǵany anyqtaldy. Qazirgi tańda politsiia PTR-testileýden ótkeni týraly anyqtamany zańsyz alǵan tulǵalardyń sanyn anyqtap jatyr», - dedi vedomstvo ókili.
Onyń sózine qaraǵanda, PTR-test qujattaryn shetelde otyryp-aq satatyn adamdar paida bolǵan.
«Sondai-aq, politsiia qyzmetkerleri elden tys aýmaqta bola turyp, virýs juqtyrmaǵany týraly PTR-test anyqtamasynyń elektrondy nusqasyn jasap, 5500 teńgege satqan qazaqstandyqty anyqtady. Anyqtamalardy «Telegram» messendjeri arqyly jiberip otyrǵan. Atalǵan oqiǵa boiynsha qujat daiyndap satqany úshin qylmystyq is qozǵaldy. Politsiia ókilderi meditsina ortalyqtaryn, emhanalar men PTR-test bekertterin astana turǵyndaryna jalǵan qujat berý faktisine tekserip jatyr», - dedi Shuǵyla Turlybek.
