Foto: Tengrinews.kz
Astanada qasbet pen konditsionerdiń qulaýynan zardap shekken jedel járdem feldsheri Uldana Myrzýan aýrýhanada qaitys boldy. Bul aqparatty qalalyq qoǵamdyq densaýlyq saqtaý basqarmasy rastady, dep habarlaidy Ult.kz.
Vedomstvo málimetinshe, oqiǵa kezinde qyzmettik mindetin atqaryp júrip aýyr jaraqat alǵan feldsher 18 qarashada kóz jumǵan.
«Astana qalasynyń qoǵamdyq densaýlyq saqtaý basqarmasy qaiǵyra habarlaidy: turǵyn úi kesheniniń qasbetindegi syrtqy kirpish qaptamasynyń jáne konditsioner qurylǵysynyń qulaýynan qyzmettik mindetin atqarý barysynda aýyr jaraqat alǵan feldsher 18 qarashada qaitys boldy», – delingen habarlamada.
Uldana 8 qarashadan beri jansaqtaý bóliminde óte aýyr jaǵdaida jatqan. Dárigerler barlyq qajetti meditsinalyq kómekti kórsetkenimen, alǵan jaraqattardan aman alyp qalý múmkin bolmady.
Esterińizge sala keteiik, 8 qarasha kúni elordadaǵy Táýelsizdik dańǵyly, 24B mekenjaiynda ornalasqan toǵyz qabatty úidiń qasbetindegi kirpish qaptama qulap, bes adam zardap shekken. Barlyǵy №1 kópsalaly aýrýhanaǵa jetkizildi. Bir naýqasqa shuǵyl ota jasaldy, taǵy ekeýi jansaqtaýda boldy. Qalǵan eki adamnyń jaǵdaiy turaqty dep baǵalanǵan.
Eń aýyr jaralanǵan – oqiǵa ornyna alǵashqylardyń biri bolyp jetken 23 jastaǵy jedel járdem feldsheri Uldana Myrzýan. Týystarynyń aitýynsha, ol jaralanǵan balany, onyń anasyn jáne týysyn qutqarý úshin júgirip barǵanda, ústine kirpishter men konditsioner bekitkishi qulaǵan.
Oqiǵadan keiin politsiia QR QK 278-baby («Sapasyz qurylys») boiynsha qylmystyq is qozǵady. Keiinirek iske 306-bap («Qaýipsizdik talaptaryna sai kelmeitin taýarlardy, jumystardy nemese qyzmetterdi shyǵarý ne satý») qosyldy.
Buǵan deiin osy úidiń turǵyndary ǵimarattyń ishinde de, syrtynda da kóptegen jaryqtar bar ekenin aityp, shaǵymdanǵany habarlanǵan.
