فوتو: Tengrinews.kz
استانادا قاسبەت پەن كونديتسيونەردٸڭ قۇلاۋىنان زارداپ شەككەن جەدەل جەردەم فەلدشەرٸ ۇلدانا مىرزۋان اۋرۋحانادا قايتىس بولدى. بۇل اقپاراتتى قالالىق قوعامدىق دەنساۋلىق ساقتاۋ باسقارماسى راستادى, دەپ حابارلايدى Ult.kz.
ۆەدومستۆو مەلٸمەتٸنشە, وقيعا كەزٸندە قىزمەتتٸك مٸندەتٸن اتقارىپ جٷرٸپ اۋىر جاراقات العان فەلدشەر 18 قاراشادا كٶز جۇمعان.
«استانا قالاسىنىڭ قوعامدىق دەنساۋلىق ساقتاۋ باسقارماسى قايعىرا حابارلايدى: تۇرعىن ٷي كەشەنٸنٸڭ قاسبەتٸندەگٸ سىرتقى كٸرپٸش قاپتاماسىنىڭ جەنە كونديتسيونەر قۇرىلعىسىنىڭ قۇلاۋىنان قىزمەتتٸك مٸندەتٸن اتقارۋ بارىسىندا اۋىر جاراقات العان فەلدشەر 18 قاراشادا قايتىس بولدى», – دەلٸنگەن حابارلامادا.
ۇلدانا 8 قاراشادان بەرٸ جانساقتاۋ بٶلٸمٸندە ٶتە اۋىر جاعدايدا جاتقان. دەرٸگەرلەر بارلىق قاجەتتٸ مەديتسينالىق كٶمەكتٸ كٶرسەتكەنٸمەن, العان جاراقاتتاردان امان الىپ قالۋ مٷمكٸن بولمادى.
ەستەرٸڭٸزگە سالا كەتەيٸك, 8 قاراشا كٷنٸ ەلورداداعى تەۋەلسٸزدٸك داڭعىلى, 24ب مەكەنجايىندا ورنالاسقان توعىز قاباتتى ٷيدٸڭ قاسبەتٸندەگٸ كٸرپٸش قاپتاما قۇلاپ, بەس ادام زارداپ شەككەن. بارلىعى №1 كٶپسالالى اۋرۋحاناعا جەتكٸزٸلدٸ. بٸر ناۋقاسقا شۇعىل وتا جاسالدى, تاعى ەكەۋٸ جانساقتاۋدا بولدى. قالعان ەكٸ ادامنىڭ جاعدايى تۇراقتى دەپ باعالانعان.
ەڭ اۋىر جارالانعان – وقيعا ورنىنا العاشقىلاردىڭ بٸرٸ بولىپ جەتكەن 23 جاستاعى جەدەل جەردەم فەلدشەرٸ ۇلدانا مىرزۋان. تۋىستارىنىڭ ايتۋىنشا, ول جارالانعان بالانى, ونىڭ اناسىن جەنە تۋىسىن قۇتقارۋ ٷشٸن جٷگٸرٸپ بارعاندا, ٷستٸنە كٸرپٸشتەر مەن كونديتسيونەر بەكٸتكٸشٸ قۇلاعان.
وقيعادان كەيٸن پوليتسييا قر قك 278-بابى («ساپاسىز قۇرىلىس») بويىنشا قىلمىستىق ٸس قوزعادى. كەيٸنٸرەك ٸسكە 306-باپ («قاۋٸپسٸزدٸك تالاپتارىنا ساي كەلمەيتٸن تاۋارلاردى, جۇمىستاردى نەمەسە قىزمەتتەردٸ شىعارۋ نە ساتۋ») قوسىلدى.
بۇعان دەيٸن وسى ٷيدٸڭ تۇرعىندارى عيماراتتىڭ ٸشٸندە دە, سىرتىندا دا كٶپتەگەن جارىقتار بار ەكەنٸن ايتىپ, شاعىمدانعانى حابارلانعان.
