Foto: QR Mádeniet jáne aqparat ministrligi
Astanada QR Mádeniet jáne aqparat ministri Aida Balaevanyń tóraǵalyǵymen Túrki mádenieti jáne murasy qory keńesiniń II otyrysy uiymdastyryldy, dep habarlaidy Ult.kz.
QR Ulttyq mýzeiinde ótken jiynǵa Túrki mádenieti jáne murasy qorynyń prezidenti Aqtoty Raiymqulova, Túrki memleketteri uiymynyń bas hatshysy Kýbanychbek Omýraliev, sondai-aq múshe elderdiń Mádeniet ministrleri qatysty.
Otyrys barysynda «Túrki áleminiń keleshegi – 2040» strategiialyq qujatyndaǵy túrki memleketteri basshylarynyń tapsyrmalary aiasynda túrki mádeni murasyn saqtaý, zertteý jáne halyqaralyq deńgeide nasihattaý boiynsha mańyzdy qadamdar talqylandy.
Aida Balaeva qordyń mádeni jáne tarihi eskertkishterdi qorǵaýda mańyzdy ról atqaratynyn atap ótti. Ministr tarihi muralardy saqtaýdyń ózektiligine toqtalyp, restavrator mamandardy daiarlaý qajettigin aitty. Ol Túrkistan qalasynda restavratorlardy oqytý jobasyn júzege asyrýdy usyndy. Bul joba mamandar arasynda tájiribe almasýǵa múmkindik beredi.
Sonymen qatar, biyl «Botai jáne Turan – túrki áleminiń negizderi» taqyrybynda seminar-timbilding ótkizý josparlanǵany habarlandy.
Aqtoty Raiymqulova keńes barysynda qordyń 2024 jylǵy jumysy týraly baiandama jasap, 2025-2026 jyldarǵa arnalǵan is-qimyl josparyn tanystyrdy.
Is-shara aiasynda QR Ulttyq mýzeiinde «Til – izgiliktiń bastaýy: Diýan lýǵat át-túrk» atty halyqaralyq kórmeniń ashylý rásimi ótti. Kórme túrki halyqtarynyń órkenietke qosqan úlesin aishyqtap, entsiklopediialyq «Diýan lýǵat át-túrk» sózdiginiń 950 jyldyǵyna arnaldy.
Aita keteiik, 2025 jyly Túrki mádenieti jáne murasy qory keńesine Qazaqstan tóraǵalyq etedi. Bul kezdesý túrki elderiniń mádeni yntymaqtastyǵyn damytýdaǵy mańyzdy qadam boldy.
