Astanada túngi klýb mańyndaǵy tóbelesten keiin 18 jastaǵy Ádi Chýkeevtiń qaza bolýyna qatysty sot úkimi shyqty. Eki sottalýshy 9 jáne 8 jyl 6 aiǵa bas bostandyǵynan aiyryldy, dep habarlaidy ult.kz.
Sot úkimi 14 tamyzda jariialandy. Medet Ábdirash pen Ádilhan Aiapbergen Qylmystyq kodekstiń 106-baby 3-bóligi boiynsha kináli dep tanyldy.
“Eýraziia” arnasynyń habarlaýynsha, sot materialdaryna sáikes, qaiǵyly oqiǵa 2025 jylǵy 27 jeltoqsanǵa qaraǵan túni Astanadaǵy BHB túngi klýbynyń mańynda bolǵan. Aldymen aýyzsha janjal týyndap, keiin tóbeleske ulasqan.
Aiyptaý tarapynyń málimetinshe, Ádi Chýkeevti aldymen Medet Ábdirash uryp, keiin oǵan Ádilhan Aiapbergen qosylǵan. 18 jastaǵy jigit aýyr jaraqat alyp, keiin qaitys bolǵan.
Sottalýshylardyń biri – buryn Ulytaý oblysynda quqyq qorǵaý organdarynda qyzmet atqarǵan azamat. Oqiǵadan keiin ol jumystan shyǵarylǵan.
Sot marqumnyń otbasynyń azamattyq talabyn da ishinara qanaǵattandyrdy. Sottalǵandar birlesip otbasyǵa:
moraldyq ziian úshin – 10 million teńge;
materialdyq shyǵyn retinde – 1,9 million teńgeden astam;
zańgerlik qyzmet aqysy retinde – 2 million teńge tóleýge mindetteldi.
Budan bólek, ár sottalǵan jábirlenýshilerge ótemaqy qoryna 78 640 teńgeden aýdarýy tiis. Protsessýaldyq shyǵyndar men memlekettik baj da óndirip alynady.
Sot barysynda kýágerlerdiń aiǵaqtary, beinejazbalar, sot-meditsinalyq saraptamalardyń qorytyndylary jáne basqa da dálelder zerttelgen.
Sot úkimi ázirge zańdy kúshine engen joq.
