Astanada týberkýlezge shaldyqqan árbir tórtinshi adamnyń tabysy kúnkóris deńgeiinen tómen. Bul týraly Qoǵamdyq densaýlyq saqtaý basqarmasynyń basshysy Qamaljan Nádirov máslihat otyrysynda aitty, dep habarlaidy "Ult aqparat" Elorda Info saityna silteme jasap.
«Byltyrǵy jyly týberkýlez aýrýyna shaldyqqandardyń 67% ekonomikalyq belsendi jastaǵylar bolyp shyqty. Onyń ishinde aýrý juqtyrǵandardyń árbir besinshisi Astanaǵa ótken jyly kelgender, sondai-aq árbir ekinshisiniń turaqty jumysy joq, árbir tórtinshisiniń tabysy kúnkóris deńgeiinen tómen. Sonymen qatar, olardyń jartysynan astamynda jeke baspanalary joq, iaǵni jaldamaly úide turady», - dedi ol.
Osylaisha, týberkýlezben aýyratyndardyń 76,6% turmystyq jaǵdaiyn tómen ekendigi anyqtaldy. Fliýro tekserýdiń nátijesi boiynsha, atalǵan toptaǵylar arasynda týberkýlez qaýpiniń joǵarylyǵy baiqalyp otyr.
«Jyl saiynǵy tekserý anyqtaǵandai, 10 myń adamnyń arasynda týberkýlezge shaldyǵýdyń 7-9 jaǵdaiy anyqtalady. Al qaýipti toptaǵylar arasynda 10 myń adamnyń arasynda 27 jaǵdai rastaldy. Bul, 2017 jylmen salystyrǵanda 2,3 esege kóp. Ótken jyldyń qorytyndysyna kelsek, týberkýlez boiynsha tekserilgen qaýipti toptardyń ishinde myń adamǵa shaqqanda 19,8% - buryn sottalǵandar, 17,6% - qańǵybastar, 4,9% AITV aýrýyna shaldyqqandar bolyp shyqty. Sol siiaqty ishimdikti jii qoldanatyn jandar arasynda da týberkýlez qaýpi joǵary», - deidi Q.Nádirov.
Odan bólek, qaýiptiligi joǵary topqa jatpaityndar arasynda, tekserilgen myń adamnyń 0,7-sinen atalǵan aýrý belgisi anyqtaldy.
Sondai-aq atap ótilgendei, Astanada atalmysh syrqattan kóz jumatyndar sany artty.
Bul úrdis týberkýlezge qarsy jańa dispanserdiń ashylýymen elordaǵa ózge óńirlerden kóship kelýshiler sanynyń artýymen túsindirilýde.
«Ótken jyly 29 adam týberkýlezden kóz jumdy. Olardyń 10-y Astanaǵa 2-3 aidyń kóleminde kóship kelgen. Aýrýhanaǵa jatqyzý kezinde jaǵdailary aýyr bolǵan», - dep túsindirdi Kamaljan Nadyrov.
Degenmen, elordada sońǵy 10 jylda týberkýlezge shaldyǵý 4,5 esege azaiǵan. Máselen, 2008 jyly 100 myń adamǵa shaqqanda - 125,1, 2018 jyly 48,1 bolǵan. Ótken jyl ishinde syrqattaný 2017 jylmen salystyrǵanda 10,2 paiyzǵa tómendegen.
